Anum ka mga progresibo kag rebolusyonaryo nga organisador sang Southern Tagalog ang gin-aresto sa panibag-o nga crackdown sang mga pwersa sang rehimen Marcos sadtong Oktobre 24 kag 27. Lakip sa mga gin-aresto ang isa ka konsultant pang-kalinong sang National Democratic Front of the Philippines.
Sa Quezon City, gindakup sang gin-isa nga pwersa sang 2nd ID kag pulis si Wigberto Villarico, kag kaupod niya nga si Marjorie Lizada, sa ginatineran nila nga balay sa Barangay Fairview, Quezon City sadtong Oktobre 24. Si Villarico konsultant pang-kalinong sang NDFP sa Southern Tagalog samtang si Lizada iya nga istap.
Ang 68-anyos nga si Villarico naga-antus sang lain-lain nga balatian.
Ang pag-aresto sa iya lapas sa Joint Agreement on Safety and Immunity Guarantees (JASIG). Siya ang ikatatlo nga konsultant sang NDFP nga gin-aresto sadto lang bulan sang Oktobre. Maathag nga ang pagdakop sa ila may katuyuan nga idiskaril ang mga pagtinguha nga buhion ang negosasyon pang-kalinong sa tunga sang GRP kag NDFP.
Sa Oriental Mindoro, gin-aresto sadtong Oktobre 24 ang mga organisador sang mangunguma nga sila Bong Fran kag Kelvin Joaquin sa Barangay Hagupit, Bongabong. Sila yara sa tunga-tunga sang pagbulig sa mga mangunguma nga apektado sang Bagyong Kristine sang arestuhon.
Ang duha gin-aresto sa epekto sang mandamyento nga ginpagwa sang isa ka korte sa Pinamalayan, Oriental Mindoro sa kaso nga rebelyon. Ginapagwa man sang mga soldado kag pulis nga nakumpiska sa ila ang isa ka .45 kalibre nga pusil, pangpalupok, mga gadyet kag dokumento.
Sa Makati City, gin-aresto sang pwersa sang estado ang duha ka mga organisador sang mamumugon sadtong Oktobre 27. Ang duha ginkilala bilang sanday Gavino Panganiban, upisyal sa kampanya sang Pamatik-KMU, kag si Maritess David halin sa pederasyon OLALIA-KMU.
Suno sa mga pulis, naga-atubang si Panganiban sa kaso nga pagpatay kag pagtilaw nga pagpatay sa isa ka korte sa Infanta kag Gumaca sa Quezon samtang si David may yara kaso nga paglapas sa Comprehensive Law on Firearms and Ammunition sa isa ka korte sa Santa Rosa, Laguna.
Nagapanindugan ang Pamantik-KMU nga ang mga pasibangud batuk sanday Panganiban kag David lubos nga wala sang basehan kag ginhimo lang agud sumpuon ang mga mamumugon kag ila paghimakas.