Hustisya, ginpanawagan sa Adlaw sang mga Patay. Nagtipon ang mga pamilya sang mga biktima sang peke nga gyera kontra-droga sa idalum sang Rise Up for Life and for Rights sa isa ka kumbento sa Quezon City sadtong Nobyembre 2 bilang pagdumdom sang Undas. Sa adlaw man nga ini, nagtipon ang mga pamilya sang desaparesidos sa Bantayog ng mga Bayani sa Quezon City. Ang mga pamilya kag tsapter sang Karapatan sa lain-lain nga rehiyon kag probinsya nagbisita sa lulubngan kag nagsindi sang kandila sa mga biktima sang pangpulitika nga pagpamatay.
Sadtong Oktobre 28, lakip ang mga grupo nga ini sa nagpiket sa atubang sang Senado agud ipanawagan ang paglagas kay Rodrigo Duterte nga sadto nagapanguna nga humalambal sa ginapatigayon nga pag-hearing sa “gyera kontra-droga” sang iya rehimen.
Piket batuk sa plantasyon sang oil palm sa Negros, ginpatigayon. Nagpiket ang mga mangunguma sa Negros Occidental sa pagpanguna sang KMP-Negros kag NFSW-Negros sadtong Oktobre 30 sa atubang sang kapitolyo sang probinsya sa Bacolod City. Nagpanawagan sila sa gobernador nga manindugan batuk sa plantasyon sang oil palm sa banwa sang Candoni kag gin-giit nga hatagan sang suporta ang mga apektado sang tiempo muerto ukon sira-galing.
Ginatos ka pamatan-on nga Pilipino, nagtipon sa kumperensya sa US. Nagtililipon halin sa lain-lain nga bahin sang United States ang mga pamatan-on nga Pilipino sa ginlunsar nila nga ikatatlo nga Kabataan Magkaisa Conference kag pangkabug-osan nga asembleya sang Kabataan Alliance sadtong Oktobre 5-6 sa University of California sa Los Angeles, USA. Ginabana-bana nga sobra 450 ka pamatan-on halin sa 113 ka organisasyon ang nagpakigbahin sa amo nga pagtililipon. Gintalakay sa kumperensya ang mga sosyal nga isyu kag kahimtangan sang mga Pilipino sa Pilipinas kag luwas sang pungsod.
