Nagmartsa patungo sa embahada ng US sa Maynila ang mga grupong pambansa-demokratiko sa pangunguna ng Bagong Alyansang Makabayan (Bayan) noong Hunyo 12 para gunitain ang ika-127 anibersaryo ng huwad na kalayaan ng Pilipinas. Binatikos nila ang umiigting na panghihimasok at interbensyong militar ng US sa Pilipinas at ang kriminal na papel ng US sa henosidyo sa Palestine.
Kinundena nila ang patuloy na paghahari ng interes at pagpapalawak ng mga base militar ng US sa Pilipinas na yumuyurak sa soberanya ng bansa. Anila, nagtataksil ang rehimeng Marcos sa mamamayang Pilipino sa pagtataguyod sa heyopulitikal na adyenda ng US sa Asia Pacific at pagpapahintulot na gamitin ang bansa bilang ekstensyon ng kapangyarihang militar nito.
Sa unang hati ng taon lamang, hindi bababa sa apat na malalaking war games ang inilunsad ng US sa teritoryo ng Pilipinas. Mula Mayo, tatlo rito ang magkakasabay na inilulunsad ng US, isa sa pamamagitan ng katambal nitong hukbo ng Australia. Ang mga ito ay ang Kamandag (Mayo 26-Hunyo 6), Kasangga (Mayo 19-Hunyo 24) at Salaknib 2025 Phase 2 (Mayo 19-Hulyo 20).
Bago ng mga ito, inilunsad ang Balikatan 40-25 noong Abril 21 hanggang Mayo 9. Hindi bababa sa 17,000 tropang Amerikano at Pilipino ang lumahok sa war games, kasama ang daan-daang mga sundalong Japanese at Australian. Sa imbitasyon ng rehimeng Marcos, nagsilbing tagamasid sa war games ang mga kinatawan at upisyal militar ng 16 pang mga bansa.
“Ang madilim na pamana ng neokolonyal na paghahari ay malinaw sa ilalim ng rehimeng ni Marcos na nagresulta sa pagpapalawak ng mga base ng US sa ilalim ng EDCA, pag-deploy ng Typhon at Nemesis missile systems, at pagtaas ng tensyon sa rehiyon,” ayon sa Bayan.
Binatikos ng grupo ang paggamit ng rehimeng US-Marcos sa usapin ng maritime dispute sa China para bigyang katwiran ang paghahanda ng digmaan gamit ang Pilipinas bilang lunsaran. Ipinapantabing umano ang usaping ito para pagtakpan ang kasaysayan ng pananakop at pag-alipusta ng imperyalismong US sa mga Pilipino.
Itinutulak ng grupo ang pagpapalayas sa lahat ng tropa at base ng US at ang pagwawakas ng mga hindi pantay na kasunduan militar ng Pilipinas dito.
Sa panahon ng protesta, nagsagawa ng pagtatanghal sa kalye ang mga aktibistang pangkultura para ipakita ang mga kolonyal na krimen ng US at ang pagpapakatuta ng mga lider ng Pilipinas sa among imperyalista. “Ang mga agresyon, pagpapalakas ng militar, at pakikialam sa mga gawain ng ibang bansa ay nagpapakita ng tunay imperyalistang layunin [ng US tabing ng ipinalalaganap na demokrasya,]” anang grupo.
Dagdag ng grupo, ang mga prinsipyong ito ng imperyalismong US ang nasa likod ng pagsuporta nito sa iligal na pananakop ng Israel sa Palestine at ng henosidyo sa mga sibilyan sa Gaza. “Dapat panagutin ang gubyerno ng US sa mga krimen nito laban sa sangkatauhan,” ayon sa Bayan. Nagpahayag ng suporta at pakikiisa ang Bayan sa pakikibaka ng mga Palestino para palayain ang kanilang bayan at mga sarili mula sa mananakop.
Noong Hunyo 12, naglunsad rin ng kilos-protesta ang mga balangay ng Bayan at mga kasaping organisasyon nito sa Kawit, Cavite at sa Cebu City.