Download: PDF | Text | HTML

Pambungad

Sa paggunita sa ika-161 anibersaryo ng kapanganakan ni Gat Andres Bonifacio at Araw ng Masang Anakpawis, inihahandog ng Ang Bayan ang koleksyong Welga at Pakikibaka: Mga Balita ng Kilusang Manggagawa sa Ang Bayan (1969-2024). Laman nito ang mahigit 100 artikulo hinggil sa mga pakikibaka ng masang manggagawang Pilipino at mga rebolusyonaryong gawain ng Partido para isulong ang militanteng kilusang manggagawa sa nagdaang higit limang dekada.

Laman ng koleksyong ito ang mahahalagang editoryal ng Ang Bayan na naglahad ng pagsusuri ng Partido Komunista ng Pilipinas at paglalatag ng mga tungkulin ng uring manggagawa sa pamumuno at paglahok sa bagong demokratikong rebolusyon. Kabilang rin dito ang ilan sa mga pahayag ng Partido sa paggunita sa Araw ng Paggawa o Mayo Uno na inilathala ng AB.

Marami sa mga artikulo ay nagtampok sa mga welga, sama-samang pagkilos at lokal na paglaban ng mga unyon para sa dagdag sahod at iba pa nilang karapatang pang-ekonomya at kagalingan. Mababatid sa mga artikulo ang mayaman at masaklaw na karanasan ng mga unyon. Mabibigyang hugis rin sa ilang artikulo ang inilunsad na pambansang kampanya ng mga manggagawa para sa dagdag sahod na kanilang walang kapagurang ipinaglaban. Binaybay din dito ang tuluy-tuloy na paglantad at paglaban sa anti-manggagawang mga patakaran sa nagdaang mga dekada, kabilang ang kontraktwalisasyon at hambalos ng neoliberalismo.

May mga artikulong naglalahad sa pamumuno ng mga manggagawa sa mga pakikibakang bayan laban sa panghihimasok ng imperyalismong US sa Pilipinas, mahigpit na pagtuwang nito sa uring magsasaka sa anti-pyudal na pakikibaka at paglalantad sa burukrata-kapitalismo.

Laman din nito ang mga artikulo na naglalantad sa kabulukan ng burges na unyonismo at mga elementong nagtataguyod ng kontra-rebolusyonaryo at maling mga kaisipan sa hanay ng mga manggagawa. Layunin ng mga elementong ito na biyakin at pigilan ang proletaryado sa pagtataguyod ng rebolusyonaryong tungkulin nito bilang namumunong uri sa pakikibaka para sa pambansang demokrasya.

Itinampok rin sa koleksyon ang pag-oorganisa ng lihim na kilusan ng mga manggagawa sa pangunguna ng Revolutionary Council of Trade Unions at ang naging tungkulin nito sa pag-aambag ng bagong mga kadre at mandirigma sa Bagong Hukbong Bayan (BHB).

Ang mga artikulo ay nakasalansan alinsunod sa bolyum at petsa ng pagpkakalathala. Nakasaad sa footnote kung saang bolyum at anong bilang ng Ang Bayan lumabas ang mga iyon. Haluan ito ng mga artikulo sa English at Pilipino. Sa mga artikulong lumabas sa kapwa wika, pinaburan ng mga patnugot na isama ang artikulong nakasulat sa Pilipino.

Ang teksto ng ilang mga artikulo sa koleksyon ay muling tinipa mula sa mga digital facsimile ng mga lumang isyu ng AB. Wala kaming binago sa mga ispeling at salitang ginamit, kahit pa ang pagbabaybay ay naiiba sa kasalukuyang sinusunod na alituntunin ng AB. Mapapansin sa ilang bahagi ang simbolong […] na nagsasaad na hindi na mabasa o nawawala ang mga salita mula sa orihinal na kopya.

Sinikap na maging masinop sa pagrepaso sa mga teksto. Kung mayroon mang pagkakamali, mangyari lamang na ipaabot sa amin upang iyon ay maiwasto.

Ikalulugod naming matanggap ang inyong mga komentaryo o katanungan tungkol sa librong ito.