Indi makadeklarar sang untat-lupok subong nga paskwa ang Partido Komunista ng Pilipinas kag Bagong Hukbong Bayan (BHB) sa atubang sang wala-puas nga gyerang pagpanumpo sang rehimen Marcos, mga opensibang operasyon militar kag pagpatuman sang laye militar sa kabukiran.
Sa desperasyon nga dugmukon ang pagpakig-away sang banwa, nagapatigayon subong ang Armed Forces of the Philippines (AFP) sang mga operasyon militar sa bilog nga pungsod batuk sa Partido kag BHB. Agud patahumon ang imahen sini sa publiko, ginpasingki sang AFP ang gyera nga disimpormasyon agud papatihon ang publiko sa kabulaskugan nga “isa ka ginpahuyang” nga larangan gerilya na lang ang uyat sang BHB. Apang ginahimutig ini mismo sang ila kaugalingon nga hulag. Minilyon ka piso ang ginauyangan subong sa dalagkuan nga pagpangplastar sang pwersa kag opensiba sa tanan nga rehiyon sa pungsod.
Ang sitwasyon ang nagatulod sa BHB nga malig-on nga isulong ang armado nga pakig-away kag maglunsar sang mga taktikal nga opensiba, ilabi na batuk sa pinakaginakangil-aran nga tropa nga pasista nga responsable sa mga ekstra-hudisyal nga pagpamatay, mga masaker kag tanan nga sahi sang terorismo. Ini agud nga pangapinan ang pumuluyo kag masabat ang ila nagabaskog nga panawagan para sa katarungan kag pagtapos sa laye militar sa ila nga mga lugar.
Bilang pagpangandam sa nagahilapit nga kahiwatan sang ika-56 nga anibersaryo sang Partido, ang mga yunit sang BHB kag mga lokal nga organisasyon masa sang mga mangunguma sa kabukiran ang masako sa pagpreparar sang mga sinapol kag ginagmay nga pagtililipon agud saulogon ang mga nagligad nga kadalag-an, tasahon ang mga kahuyangan kag kabaskugan, kag liwat pabakuron ang ila desisyon nga maglunsar sang mas dalagkuan nga paghimakas sa masunod nga tuig.
