Nakabalik na sa Pilipinas ang biktima sang human trafficking nga si Mary Jane Veloso, pagkatapos ang halos 15 ka tuig nga pagkabilanggo sa Indonesia. Ginsugata siya sang iya mga bata, ginikanan, abogado kag mga tigsuporta halin sa Migrante Philippines kag Save Mary Jane Task Force sa paluparan sang kaagahon sadtong Disyembre 18. Gintugutan siya nga madasig nga mahakos ang iya mga bata kag utod pagsulod niya sa bilangguan sang mga babaye sa Mandaluyong City. Panawagan nila sa rehimen Marcos, hatagan sang clemency ukon pagpasaylo si Veloso kag tugutan siya nga magpauli sa iya pamilya.
Pareho sang minilyon ka Pilipino nga migrante, nagsugod ang estorya ni Veloso sang magdesisyon siya nga magkadto sa luwas sang pungsod sadtong 2010 para mahatagan sang maayo nga buasdamlag ang iya duha ka bata. Ginpasaligan siya ni Maria Kristina Sergio, isa ka rekruter, sang trabaho bilang isa ka kabulig sa balay sa Malaysia. Pag-abot sa Malaysia, ginhambal sa iya nga may nakakuha na sang iya nga trabaho kag liwat nga ginpasaligan sang bag-o.
Samtang nagahulat, ginsugo siya ni Sergio nga magkadto sa Indonesia kag ginhatagan sang maleta nga magamit para sa byahe. Lipod sa iya ihibalo, nakatago sa maleta ang 2.6 kilo nga heroin (ginadumulian nga druga) kag natukiban ini sang mga pulis paghugpa niya sa Yogyakarta, Indonesia. Gilayon siya nga ginkasuhan sang Indonesia kag madasig nga ginhukman sang silot kamatayon. Gintalana ang pagpatay sa iya paagi sa firing squad sadtong Abril 19, 2015.
Sa duso sang wala untat nga kampanya sang Migrante kag mga progresibo nga organisasyon kag abogado, katimbang ang iya pamilya, napunggan ang pagpatay kay Veloso sadtong 2015.
Ginapakita ni Veloso ang kabudlayan kag ang paghimakas sang madamo nga Pilipino nga migrante nga nagapangatubang sang pagpanghimulos kag pagpamigos sa luwas sang pungsod, indi luwas nga mga kundisyon sa pamugon, mga estrikto nga mga dumuluong nga sistema sa korte kag kawad-on sang suporta sang gobyernong Pilipino. Indi magnubo sa 49 pa ka migranteng Pilipino ang nagapangatubang sang silot nga kamatayon sa iban nga pungsod, kalabanan sa mga kaso nga may kaangtanan sa iligal nga druga.
Sini nga 2024, yara sa 2,457 ka migrante ang nalista sang Department of Migrant Workers ang nabilanggo sa lain-lain nga bahin sang kalibutan. Sa tanan nga mga ini, 46 ka kaso lang ang nadaog sang mga abogado sang Pilipinas kag 204 ang napierdi.
