Ang lain na usab nga hugna sa panagbugno sa mga Marcos ug Duterte salamin sa kalalum sa krisis sa pulitika sa dunot nga nagharing sistema. Ginapakita niini ang dili maresolbang bangi sa mga magkaaway nga paksyon sa mga burukrata-kapitalista nga parehong hakog sa gahum ug mga kawatan sa kwarta sa katawhan.
Gilaumang mosangpot sa bangis nga yugto ang bangi tali sa duha ka paksyon nga parehong hakog sa gahum. Subling miinit ang bangi niining bag-o lang human nabutyag ang korapsyon ni Vice President Sara Duterte sa paggamit sa kapin ₱600 milyong “confidential and intelligence funds.” Atubangan sa desperasyong tabunan ang nabutyag nga korapsyon, giwarawara ni Duterte ang iyang gahum dihang mibalibad nga magpailalum sa gihimong imbestigasyon sa Kongreso ug mihimo og mga iligal nga lakang aron babagan kini.
Direktang gihulga ni Duterte ang kinabuhi ni Marcos, asawang si Lisa ug Speaker Martin Romualdez, nga pareho niyang giakusahan nga nangbahad sa iyang kinabuhi. “Gipatulan” ni Marcos ang maong hulga ug gipalihok ang pulis ug lain-laing ahensya sa estado aron maghimo og mga ligal nga lakang batok kang Duterte. Atubangan sa nagkakusog nga panawagang impeachment o pagpalagpot kang Sara Duterte, mieksena usab ang iyang amahang si Rodrigo, kanhing presidente, nga direktang nanawagan sa mga batang upisyal sa militar nga molihok atubangan sa matud niya “bali-bali nga pagpangulo” ni Marcos. Gisakyan ni Rodrigo Duterte ang mga reklamo sa katawhan batok sa rehimeng Marcos ug sentimyentong kontra sa imperyalismong US, aron tabunan ang pagpaantus, pasismo ug pagpakaitoy kanhi sa iyang rehimen sa US ug China.
Labaw nga gisugnuran sa maong bangi ang kasilag sa katawhang Pilipino sa mga nagharing hut-ong, partikular na sa nagharing paksyon sa mga Marcos ug Duterte. Sayod kaayo ang katawhan nga ang maong panagbangi alang gahum wala naggikan sa unsamang taas nga prinsipyo o tinguha, kundili sa pag-inilugay sa dakung badyet, mga kontrata sa gubyerno, kontrol ug impluwensya sa militar ug pulis, ug uban pang pribilehiyo alang sa tagsa-tagsa nilang pamilya ug pundok sa mga burukratang kapitalista. Ginarepresentahan nila ang pinakadunot nga dinastiya sa pulitika, nga gilaumang magbugno ug magsinikhanay sa umalabot nga eleksyon.
Labaw nga mihait ang kasuko sa katawhan sa tibuok nagharing sistema tungod sa pagkabutyag sa korapsyon ug krimen sa mga nakalingkod sa poder—pareho sa mga Duterte ug Marcos. Samtang binilyong pisong salapi sa katawhan ang inadlaw-adlaw nga giusik-usikan sa mga Marcos ug mga Duterte, gatusan ka milyong mamumuo, mag-uuma, mga kabus, ordinaryong mga empleyado ug gagmayng propesyunal ang inadlaw-adlaw nga nag-antus sa nagkamahal nga presyo sa mga palaliton ug singil sa mga serbisyo, ubos nga suhulan ug dili igong kita, kawalay trabaho ug panginabuhian, pagpangilog og yuta, pagkalubong sa utang ug uban pang mga palas-anon.
Samtang nagbugno ang mga Marcos ug Duterte, kinahanglang molihok ang katawhan aron panalipdan ang ilang ekonomikanhong kaayuhan ug mga katungod, papanubagon ang mga Duterte sa ilang mga krimen sa katawhan, ug singilon si Marcos sa pakigkunsabo sa mga Duterte aron makabalik sa poder, ug sa paggamit sa terorismo sa pasistang estado aron sumpuon ang katawhang misukol. Makanunayong tay-ogon ang nagharing rehimeng Marcos pinaagi sa nagkadakung mga protesta ng katawhan.
Ang pagduso sa pipila ka organisasyon sa kasong impeachment batok kang Sara Duterte sa Kongreso angayang suportahan sa lapad nga katawhan isip paghatag og tingog sa ilang kasilag sa korapsyon ug pag-usik-usik sa pondo sa katawhan. Angayan kining ipanghingusog sa katawhan ilabina atubangan sa pamahayag ni Marcos nga dili na kini ipadayon, sa kabalakang mapanimaslan siya sa mga Duterte. Dungan sa pagpalagpot sa bise presidente, kinahanglang kusganong iduso sa katawhan ang kasong gipasaka sa International Criminal Court batok kang Rodrigo Duterte, ug ipanghingusog nga siya dakpon, prisohon, taralon ug silutan isip kabayaran sa iyang mga krimen sa katawhan.
Samtang ginasingil si Rodrigo Duterte sa iyang mga krimen sa katawhan, kinahanglang singilon sa katawhan ang rehimeng Marcos mahitungod sa malukpanong korapsyon sama sa gatusan ka bilyong Maharlika Fund, pagbawi sa kinawat nga bahandi sa pamilyang Marcos, pag-usik-usik sa binilyong pisong “intelligence funds” ug “unprogrammed funds,” walay puas nga pagsaka sa presyo sa bugas, lana ug uban pang palaliton, pagkalansang sa suhulan, mga palisiyang makilangyaw ug kontra-kabus, ug pagpanumpo sa mga demokratikong katungod.
Kinahanglang mahatagag dalan ug porma ang kolektibong pagpakita sa kasuko sa katawhan sa daw halas nga nagharing paksyonng Marcos ug Duterte. Kinahanglang ilunsad ang mga asembliya, porum, mga panaghisgot sa katawhan ug uban pang porma sa panagtapok sa masa sa mga kampus, pabrika, mga komunidad, upisina, merkado, simbahan ug sa uban pang lugar tigumanan. Himuon kining daluyan sa kalihukang pagtuon sa mga isyu ug problema sa katawhan, ug pamaagi alang sa pagpadayag sa reklamo sa katawhan.
Kinahanglang hugpungon ang katawhan sa lain-laing porma, ang-ang ug langkub sa mga ugnayan, alyansa ug organisasyon. Kinahanglang makanunayong pakusgon ang mga unyon ug organisasyong masa nga nagsilbing uyok sa pagtukod sa mas lapad nga panaghiusa sa katawhan.
Aron mahimong tinuod nga pwersa sa pakigbisog ang masa, kinahanglang mahukmanong motikang pasulong ang gatusan hangtud liboang mga kadre, propagandista ug organisador nga magtampo sa tanan nilang kahibalo ug katakus, tibuok-panahong molubog sa masa ug bug-os nga gakson ang ilang kinabuhi ug pakigbisog.
Dungan sa pagsalmot sa mga pakigbisog sa kongreso, mga korte, mga ahensya sa gubyerno ug uban pang natad sa pakigbisog—ug labaw niining tanan—kinahanglang dalhon sa katawhan ang pakigbisog sa kadalanan, kung asa mapakita ug magamit ang ilang kusog nga nakabase sa ilang lapad ug lig-on nga panaghiusa. Sa mga rali sa kadalanan, tibuok-kusog nilang mapakita ang ilang mga mulo, ug mapanalipdan ang ilang mga pangayo.
Ang burukratang kapitalismo, uban sa imperyalismo ug pyudalismo, ang naglangkub sa tulo ka batakang problema sa katawhang Pilipino, nga nag-unang girepresentahan karon sa paantus ug pasistang rehimeng US-Marcos. Matapos lamang ang maong mga problema sa pagpaasdang sa nasudnon-demokratikong rebolusyon pinaagi sa ng armadong pakigbisog subay sa estratehiya sa malungtarong gubat sa katawhan, aron kab-uton ang tinuod nga nasudnong kagawasan ug demokrasya.
