Ang Pambansang Katipunan ng Magbubukid (PKM)-Negros nagapadangat sang iya mataas nga pagsaludo sa tubtob kamatayon nga pag-alagad ni Kaupod Luis Jalandoni sa rebolusyonaryong kahublagan sang mga pumuluyong Pilipino.
Nagabakho kami sa imo pagtaliwan, may madamo ka nga handumanan nga ginbilin kon paano ginpukaw, gin-organisa kag ginpahulag ang malapad nga masang mangunguma kag mamumugon ilabe na ang mga sakada. Ang pagpamuno sa Social Action Center sadto nagmarka sa kasaysayan nga naghatag sang kusog kag kaisog sa mga kubos nga madugay na gindingutan sang hustisya sosyal nga makig-away sa lain-lain nga porma sang pyudal kag mala-pyudal nga pagpanghimulos sa isla.
Nangin inspirasyon ka sang tanan nga mga mangunguma kag mamumugon, ginbalewala ang sahi nga ginhalinan nga gikan sa hanay sang dalagko nga agalon may duta. Lubos nga gintalikdan ang tanan nga kasulhayan kag pribilehiyo para sa pumuluyong Pilipino. Nangin malig-on ang panindugan, ginpangibabawan ang tanan nga sakripisyo, kabudlayan kag gindepensahan kag ginbayaw ang integridad sang mga pigos kag ginahimuslan kag rebolusyonaryong kahublagan.
Ka Louie, palangga ka namon kag ginahandom sang malapad nga masang mangunguma kag mamumugon sa hasyenda, kahibalo kami kon daw ano ka dako ang imo pagtinguha nga maorganisa sila kag mapundar ang ila malig-on nga organisasyon. Indi malipatan ang mainit kag malig-on nga pagsuporta sang mga tawong simbahan sa aksyon masa nga ginasulong agud maangkon ang matuod nga deretso kag kinamatarung sang mga mamumugon sa kampo.
Ang imo malig-on nga pagpadayon sang rebolusyonaryong hilikuton tubtob sa kamatayon pamatuod sang madalom nga paghakos kag pagkabuhi sang sandigan nga prinsipyo sang Marciamo-Leninismo-Maoismo(MLM). Isa ini ka dako nga hangkat para sa tanan nga katapo sang Partido kag rebolusyonaryong kahublagan nga ipadayon ang kawsa tubtob maabot ang himpit nga kahilwayan kag demokrasya.