Press Statement
April 22, 2017
Base sa matinud-anong kaakuhan sa rebolusyonaryong kalihukan sa North Eastern Mindanao Region sa pagsuporta sa panaghisgot pangkalinaw ug pagtamod sa hangyo sa mga pamilya sa POW, nakatakdang ireles karong bulana si Pfc. Edwin Salan sa 30th IB PA. Giandam na sa Bagong Hukbong Bayan-Front 16 Custodial Forces ang mga panginahanglan alang sa hapsay ug luwas nga pagrelis sa maong POW.
Magtulo na ka bulan human nadakpan si Pfc. Edwin Salan niadtong Enero 29, 2017 didto sa Barangay Buodlingin, Alegria, Surigao del Norte atol sa ilang paglunsad og COPD. Una nang gikataho nga buhian ang POW kaniadto pang unang mga bulan, apan tungod kay nagpadayon ang mga operasyong militar nga gihimo sa AFP, nalangan kini.
Ubos sa kustodiya sa BHB – Front 16, gitratar si Pfc. Salan pinasubay sa napatik nga mga probisyon sa Komprehensibong Kasabutan diha sa Pagrespeto sa Tawhanong Katungod ug Internasyonal nga Makitawhanong Balaod o CARHRIHL, ug sa uban pang mga internasyonal nga balaod sa gubat. Matngong gitubag sa BHB Custudial Force ang mga personal nga panginahanglan sa POW ug makanunayong gimonitor ang kahimtang sa iyang panglawas.
Ang BHB-NEMR ug tibuok rebolusyonaryong pwersa sa rehiyon magdahom nga respetohan sa AFP/PNP ang maong aktibidad sa pagrelis aron maseguro ang kaluwasan sa POW, sa mga modawat nga third party facilitators, mga pamilya sa POW ug sa mga mosaksi niini. Magarantiya kini kun ipatuman sa AFP/PNP ang suspension of military operations (SOMO) ug suspension of police operations (SOPO) sa mga lugar diin asa buhian ang POW, partikular sa mga lungsod sa Alegria, Bacuag, Gigaquit, Tubod, Placer, Claver sa probinsya sa Surigao del Norte.
Giawhag ang mga opisyal sa gobyerno sa Surigao del Norte nga motabang nga mapahigayon ang nakatakdang pagrelis sa POW. Giaghat usab ang mga katawhan nga nagpakabana, mga kaparyentehan ug pamilya sa POW nga hangyoon ang mga opisyal sa AFP ug PNP nga matinud-anong mosanong sa mga gikinahanglan alang sa hapsay, luwas ug malampusong pagreles kang Pfc. Edwin Salan.
Ka Ariel Montero
Tigpamaba
Regional Operational Command
