Mabuhi ang ika-51 nga anibersaryo sa Bagong Hukbong Bayan (BHB) karong Marso 29, 2020!
Ang National Democtratic Front of the Philippines – North Eastern Mindanao Region (NDFP-NEMR), nagpadangat sa taas nga pagsaludo ngadto sa BHB ug sa iyang mga kadaugang naangkon dinhi sa rehiyon ug sa tibuok nasud.
Niini usab nga adlaw, atong handumon ug pasidunggan ang tanang rebolusyonaryong martir sa NEMR ug sa Pilipinas sa han-ay sa BHB, milisyang bayan, yunit pang-depensa-sa-kaugalingon ug mga masa. Nabuhis ang ilang kinabuhi sa pagpanalipod sa interes sa katawhan ug sa pagpatuman sa mga tahas sa rebolusyon. Himoon natong inspirasyon ang ilang kabilin ug dad-on ang gubat sa katawhan ngadto sa kadaugan.
Sa damgo sa rehimeng US-Duterte nga pukanon ang rebolusyonaryong pwersa ug paludhon ang katawhan sa iyang diktadurang paghari, todo-largang kabangis ang gilunsad niini sa kabanikanhan ug sa kasyudaran. Dinhi lang sa NEMR gikan 2016 hangtud sa kasamtangan, liboan na ang nabiktima sa pagpanglapas sa tawhanong katungod. Mikabat na sa 86 ka mga sibilyan, lider-aktibista ug tigpanalipod sa tawhanong katungod ang gipangdakop. Miabot sa 21 ang biktima sa ekstra-hudisyal nga pagpangpatay, ug pila ka kaso sa pakyas nga pagpatay. Ug, mokapin na sa 1,000 ang pugos-peke nga pagpasurender.
Dose na ka higayon nga pugos nga mibakwit ang libuan ka pamilya gumikan sa paturagas ug pinatakang pagpangbomba, pagpang-istraping gamit ang eroplanong pangbomba sa AFP ug pagpanganyon duol sa mga komunidad, kabalayan ug kaumahan; pagsaka-saka sa mga kabalayan ug pagpangutingkay sa mga kabtangan; ug, pagtanom og armas ug bomba alang sa tinumotumong kasong ipasaka ngadto sa ilang gidudahang nagsuporta sa BHB ug nagsaway kang Duterte.
Direktang gi-target ang mga kabalayan sa sibilyan sa pagpamusil, sama sa bag-ohay pa lang nga panghitabo niadtong Pebrero 21 niining tuiga, nga hinimoan sa mga pwersa sa 3rd SFB PA. Miresulta kini sa pagkaangol sa lima ka Lumad, lakip ang sayes anyos nga bata, ug pagkatusak-tusak sa mga bala sa 12 ka balay sa Sityo Simowao, Brgy. Diatagon, Lianga, Surigao del Sur.
Ginudnod pa sa rehimeng Duterte sa tumang kapobrehon ang katawhan, pinaagi sa pagpatuman sa maki-langyaw ug kontra-katawhang mga balaod ug palisiya. Gawas pa kini sa padayong pag-ilog sa agalong yutaan sa yutang gitikad sa mga mag-uuma, taas nga abang sa yuta, taas nga interes sa pautang, kabarato sa presyo sa mga produkto sa mga mag-uuma, taas nga presyo sa mga batakang palaliton, kawalay trabaho, kaubos sa suhulan, ug daghan pang uban.
Angayang mahimong kabahin ang tibuok katawhan sa mamugnaong pagpukaw, pag-organisa ug pagpalihok alang sa demokratikong rebolusyon sa katawhan isip bugtong sulbad sa makihut-ong nga pagpandaugdaug ug pagpahimulos.
Kolektibong molihok alang sa mamugnaong pagsumpo sa COVID-19, nga gisagubang sa tibuok kalibutan karon.#
Ka Maria Malaya
Tigpamaba
NDFP-NEMR