Ginpalupok sadtong Disyembre 4 ang wala sang plaso nga pangkabug-osan nga welga sang mga mamumugon sa South Korea sa idalum sang Korean Confederation of Trade Unions (KCTU) bilang sabat sa deklarasyon nga layi militar sang presidente sang pungsod nga si Yoon Suk-yeol. Naga-isip sang 1.2 milyon ka mamumugon ang katapo sang KCTU,ang pinakadako nga pederasyon sang mga unyon sa pungsod.

Ang pagpatuman sang layi militar taktika lang ni Yoon Suk-yeol agud ipiton ang pumuluyo kag magpabilin sa pwesto sa tunga sang nagaragasa nga krisis pulitika, suno sa KCTU. Ginrason ni Yoon ang “paglutos sa mga pwersang maka-North Korea” kag “pagpabilin sa kaayusan konstitusyonal” agud ipatuman ini. Apang suno sa KCTU, rason lang ini ni Yoon agud palawigon ang kaugalingon sa poder tungod naipit na siya sa pulitika. Pila ka bulan na nga ginabayo sang krisis ang administrasyon ni Yoon, nga naga-atubang sa 22 ka reklamo nga impeachment, kag dugang nga 10 nga wala pa napasaka. Ginakangil-aran ang iya administrasyon tungod sa kontra-mamumugon nga mga patakaran kag pagka-sunod-sunoran sa imperyalismong US.

Padayunon sang mga mamumugon ang ila welga tubtob indi magpanaog sa pwesto si Yoon.