Gindumdom sang Communist Party of India- (CPI) Maoist ang ika-24 nga anibersaryo sang People’s Liberation Guerilla Army (PLGA) sa isa ka semana nga kahiwatan halin Disyembre 2 tubtob Disyembre 8. Panawagan sa kahiwatan ang pagpalapad sang baseng masa, pagpadamo sang rebolusyonaryong pwersa kag pagpreserba kag pagpauswag sang Partido, PLGA kag rebolusyonaryo nga nagahiliugyon nga prente. Gina-engganyo sang Partido ang pagpasingki sa pagpakig-away sa kontra-rebolusyonaryo nga gyerang “Kagaar” nga ginbuhian sang sentral nga estado nga Indian batuk sa pumuluyong Indian kag Adivasi.
Ginpangunahan sang Komisyon Militar sang CPI (Maoist) ang pagtasa sa nalab-ot sang PLGA sa isa ka tuig nga pagsulong sang rebolusyonaryong inaway sadtong Oktobre. Ginkilala sini ang mga pag-atras tuga sang internal nga mga kahuyangan kag limitasyon, subongman bunga sang mabaskog nga atake sang kaaway. Ginbalikan sini ang mga kadalag-an kag leksyon halin sa mahinungdanon nga desisyon nga ginpatuman sang Partido halin 2019, nga nagbunga sang pagbuylo sa armado nga paghimakas sa masunod nga mga tuig (2020-2022).
Kadungan sini, ginkilala sang CPI (Maoist) ang positibo nga mga inagihan sa pagpakig-away gerilya kag madinalag-on nga pagpahulag sa pumuluyo sa mga paghimakas nga kontra-imperyalista, kontra-burgesya kumprador, kontra-pyudal kag kontra-militarisasyon.
Isa diri ang pagpanglusob sang gintingob nga pwersa sang PLGA halin sa lain-lain nga yunit sa kampo sang pulis sa South Bastar sa Dandakaranya sadtong Enero 16. Sa reyd nga ini, ginpalibutan sang mga gerilya ang kampo nga ginatawohan sang 500 ka paramilitar kag ispesyal nga pwersang kumando, kag ginpaulanan sang masobra 1,000 ka granada halin sa mga spigot grenade launcher kag ginatos ka bala. Masobra 35 ka pulis kag kumando ang napapas kag 40 ang napilasan.
Ginpadayon sang mga yunit sang PLGA ang paglunsar sang mga taktikal nga opensiba sandig sa panawagan sang Partido para sa isa ka kontra-opensiba nga kampanya halin Marso tubtob Hunyo.
Nagresulta ini sa indi magnubo sa 100 ka aksyon gerilya sa una nga 10 ka bulan sang tuig. Sa sini nga panahon, 64 ka kaaway ang napatay kag 120 ang napilasan.
Bisan pa man, mas manubo ang isip nga ini kumparar sa nagligad nga mga tinuig, suno sa CPI (Maoist). Indi nangin bastante ang mga pagpaninguha para pagaron ang kahalitan nga naangkon sa mga atake sang kaaway. Sa sulod sang 10 ka bulan lang, naglab-ot sa 254 ang nadagas nga mga hangaway sang PLGA. Ini tuga sang pagpadayon sang mga naandan nga gawi kag kahuyangan nga sekretuhon ang hulag kag pamaagi sang hukbo nga gerilya, suno sa Partido.
Para arestuhon ini, ginmanduan sang Partido ang PLGA nga sigurohon ang preserbasyon sang suhetibo nga mga pwersa kag likawan ang mga kahalitan. Suno diri, kinahanglan bag-uhon ang pamaagi sang pagkampo, pagbalhin, pagkuha sang mga armas, mga pulong kag pagtuon, paghanas militar kag paggamit sang mga elektroniko nga gadyet. Kinahanglan nga bungkagon ang mga network sang mga impormer, espiya, “nagbalik sa sabak sang gobyerno” kag mga double agent nga natanom sang kaaway sa mga komunidad kag nyutralisahon ang ila nga epekto.
Sa tantya sang Partido, naglab-ot sa 800,000 ka tropa sang pulis, paramilitary, kumando, air force kag mga ispesyal nga pwersa ang ginbubo sang reaksyunaryo nga estado sang Indian sa kampanya nga Kagaar. Ginsakop kag gin-okupar sang mga ini ang ginasuspetsuhan nga mga rebolusyonaryong base, lakip ang mga kalasangan. Ang mga lugar nga ini ang target sang dumuluong kag lokal nga korporasyon para tukuran sang mga dam, planta nga pang-enerhiya kag minahan.
Sa atubang sini, ginhatagan tum-ok sang Partido ang kakinahanglanon nga pauswagon ang PLGA para mas epektibo ini nga makalunsar sang pakig-away gerilya.
Dugang sini, kinahanglan nga tugahon ang isa ka malapad nga kahublagan para punggan ang kontra-rebolusyon nga pagpang-atake sa pumuluyo. Dapat pakig-awayan ang tuyo sang nagahari nga hubon nga Hindutva, nga tiglawas sang rehimen nga Modi, nga itukod ang isa ka “estado nga Hindu nga ginapadalagan bilang korporasyon.” Sa idalom sang iskema nga ini, tanan nga kalasangan sang pungsod ang igatugyan sa mga lokal kag dumuluong nga kumpanya sa agrikultura, pagmina, planta pang-enerhiya kag iban pa sa kahalitan sang mga pumuluyong Indian kag Adivasi.
