Balligi ti CBA iti Daiwa Seiko Philippines. Maysa nga aldaw kalpasan a naganunsyo ti plano a welga dagiti mangmangged iti Daiwa Seiko Philippines Corporation dagus nga immanamong ti kapitalista a kumpanya iti Malayang Unyon DSPC-OLALIA-KMU iti maysa a baro a collective bargaining agreement (CBA) nga immunan nga intantan ken binarat ti kumpanya. Nagbotos pabor iti welga ti unyon idi Nobiembre 12 ken pinirmaan ti CBA idi Nobiembre 13.
Baro a CBA iti Philippine Span Asia Carrier Corp. Kalpasan ti maysa a tawen, naipangabak ti Samahan ng Manggagawa sa PSACC-NAFLU-KMU ti baro nga CBA idi Oktobre. Nagun-od ti unyon iti nayon a sueldo, nayon a bayad kas iti longevity pay ken dadduma pay a benepisyo. Iti bangir daytoy, naduma-duma ti gandat ti maneydsment nga idiskaril ti negosasion, naipilit dagiti mangmangged ti karbenganda.
Protesta iti pananglabsing ti CBA iti Philfoods. Nagprotesta idi Nobiembre 11 dagiti mangmangged iti Philfoods Fresh Baked Products Inc iti Laguna Industrial Park idiay Biñan, Laguna. Imballaag ti unyon iti kapitalista a tungpalen dagiti napagkaykaysaan a probisyon iti agdama a CBA mairaman ti pannangted ti alawans para iti makan ken retroactivity.
Laban ti unyon iti Golden Zone Garments. Binatikos dagiti mangmangged ti Golden Zone Garments and Accessories Inc (GZGAI) ti DOLE ti panagkedked daytoy a bigbigen ti unyon da a Nagkakaisang Manggagawa ng GZGAI kas Sole and Exclusive Bargaining Agent (SEBA) iti kumpanya. Naala ti unyon ti mayorya a boto iti pananganamong dagiti mangmangged tapno agbalin nga SEBA. Nupaykasta, induron ti DOLE ti proseso a “validation” iti uneg ti pabrika uray pay kumpleton dagiti dokumento nga insumite ti unyon.
Protesta maibusor ti panangsupiat kadagiti mangmangged. Nagprotesta dagiti grupo ti mangmangged iti Quezon City idi Nobember 16 tapno lagipen ti International Day Against Trade Union Repression. Nagsindi da iti kandela kas panawagan ti hustisya kadagiti mangmangged ken unyonista a pinapatay dagiti puwersa ti estado iti napalabas a tawen. Nagtalinaed a maysa kadagiti napeggad a pagilian para kadagiti mangmangged ti Pilipinas ti tawen 2024.
