Iti umay a Disyembre 10, balbaliw a lagipen ti Internasyunal nga Aldaw ti Karbengan-tao. Daytoy a tawen, panawagan ti nadumaduma a grupo ti panangsingir ken Ferdinand Marcos Jr, bayat a pagsungsungbaten ti dati a rehimen Duterte kadagiti krimen na iti umili.
Kaudian a krimen ti rehimen ti panangpatay dagiti tauhan ti Armed Forces of the Philipippines (AFP) ken Honeylet Herrera, maysa nga agtagibalay, iti Sityo Balogo, Barangay Cristo, Donsol, Sorsogon idi Nobyembre 2. Pinabasol da isuna nga addaan kainaigan iti New People’s Army (NPA).
Segun iti NPA-Sorsogon (Celso Minguez Command), bales daytoy ti militar kadagiti sibilyan iti komunidad kalpasan ti panangdusa ti NPA iti ahente ti paniktik a ni Darius Laya idi maudi a lawas ti Oktubre. Ni Laya ket karaman iti panangisagmak kadagiti kabaranggayan na ken panagitudo kadagiti sibilyan, kabilang ni Herrera nga addaan silpo iti hukbo ti umili.
Panagaresto. Inaresto dagiti soldado ti 85th IB ni Allan Aragon, katutubo a Manide, iti komunidad iti Barangay Cabatuhan, Labo, Camarines Norte idi Nobyembre 20. Saan pay a nasapulan dagiti kabagyan na ti ayan na agingga iti agdama. Kalpasan ti panag-aresto, dursok a nagpatudo ti bala ti 85th IB iti barangay.
Idiay Negros Occidental, inaresto dagiti pulis ti maysa a 29-anyos nga alyas “Rafael” iti Barangay Caradio-an, Himamaylan City iti kaso nga illegal possession of firearms. Parparwaren dagiti pulis a nakumpiskar kenkuana ti maysa nga improvised wenno bukod nga aramid a 12-gauge shotgun nga addaan dua a bala. Inakusaran met isuna dagiti pulis a “kumander ti yunit ti milisya” uray pay “pinasurender” isunan iti napalabas.
Panaglipit. Idiay la Union, binulabog ti tallo nga elemento ti 5th ID ti balay ni George Cacayuran, pangulo ti Timek-Pamalakaya, idi Nobyembre 20 iti bigat idiay Barangay San Manuel Norte, Agoo.
Idiay Rizal, kinumpronta dagiti residente ken katutubo a Dumagat-Remontado ti Barangay San Andres, Tanay, Rizal dagiti soldado ti AFP iti panagraut dagitoy iti komunidad da idi Nobyembre 26. Plano ti AFP nga usaren ti ansestral a daga dagiti Dumagat-Remontado kas reserbasyon wenno kampo a militar.
Idiay Negros Oriental, dua a balay ti pwersado a sinerrek ken sinukimat ti 62nd IB idi Nobyembre 27. Sinerrek da ti balay da Joan Lechan ken ti pamilya a Perolino nga addaan ubbing nga agtawen ti 2 ken 5 idiay Sityo Gusa, Barangay Budlasan, Canlaon City. Pinangtaan dagiti pasista a soldado ti pamilya a Perolino nga imasaker da dagitoy nu saan da a sumungbat iti interogasyon.
