Nagmalampuson ang CBA sa Daiwa Seiko Philippines. Usa ka adlaw human nag-anunsyo og planong welga ang mga mamumuo sa Daiwa Seiko Philippines Corporation, dihadiha nga nakignegosasyon ang kapitalista sa kumpanya sa Malayang Unyon sa DSPC-OLALIA-KMU para sa usa ka bag-ong collective bargaining agreement (CBA) nga una nang gidilatar ug gidaginot sa kumpanya. Miboto pabor sa welga ang unyon niadtong Nobyembre 12 ug gipirmahan ang CBA niadtong Nobyembre 13.
Bag-ong CBA sa Philippine Span Asia Carrier Corp. Human sa usa ka tuig, napadaug sa Samahan ng Manggagawa sa PSACCNAFLU-KMU ang bag-ong CBA niadtong Oktubre. Nakakuha ang unyon og dugang-suhulan, dugang nga mga benepisyo sama sa longevity pay ug uban. Taliwala sa nagkalain-laing paningkamot sa maneydsment nga idiskaril ang negosasyon, naduso sa mga mamumuo ang ilang katungod.
Protesta batok sa paglapas sa CBA sa PhilFoods. Nagprotesta niadtong Nobyembre 11 ang mga mamumuo sa Philfoods Fresh Baked Product Inc sa Laguna International Industrial Park sa Biñan, Laguna. Nanawagan ang unyon sa kapitalista nga tumanon ang nauyunang mga probisyon sa kasamtangang CBA lakip na ang paghatag og alawans sa pagkaon ug retroactivity.
Pakigbisog sa unyon sa Golden Zone Garments. Gimakmak sa mga mamumuo sa Golden Zone Garments and Accessories Inc (GZGAI) ang DOLE tungod sa pagdumili niini nga ilhon ang ilang unyon nga Nagkakaisang Manggagawa ng GZGAI isip sole and exclusive bargaining agent (SEBA) sa kumpanya. Nakuha sa unyon ang mayorya sa boto sa mga mamumuo aron mahimong SEBA, apan gipadayon pa gihapon sa DOLE ang prosesong “validation” sulod sa pabrika bisan og kumpleto na ang dokumento nga gisumite sa unyon.
Protesta batok sa pagpanumpo sa mga mamumuo. Nagprotesta ang mga grupo sa pamuo sa Quezon City niadtong Nobyembre 16 aron dumdumong ang International Day Against Trade Union Repression. Nagdagkot sila og kandila isip panawagan sa hustisya alang sa mga mamumuo ug unyonista nga gipatay sa mga pwersa sa estado niining milabayng tuig. Nagpabiling usa sa labing peligrosong nasud alang sa mga mamumuo ang Pilipinas sa tuig 2024.
