Lubos nga ginakalipay sang Pambansang Katipunan sang Magbubukid (PKM) – Negros ang pagpatuman sang rebolusyonaryong hustisya sa mga Pulang hangaway sa idalom sang Apolinario Gatmaitan Command-New People’s Army (AGC-NPA) batok sa mga intel aset kag espiya sang militar lakip na ang mga nagabaligya sang iligal nga droga.
Nagapartisipar sila sa giyera batok sa pumuluyo kaangay sa paggiya sang militar sa ila mga operasyon kag ginagamit nga tagapanilag sang mga pumuluyo nga ginapasibangdan nga mga katapo ukon tagasuporta sang mga NPA.
Nangin instrumento man sila, upod sang Armed Forces of the Philippines (AFP) kag Philippines National Police (PNP), sa madamu nga pagpanglapas sang tawhanon nga kinamatarung kaangay sang pagpamatay, pagpangmomba, pagpangastigo, pagpamahug, pagpangransak kag ibp.
Dugang pa, ang mga ginpahamtangan sang silot kamatayon may yara na kaso nga gin-atubang sang reaksyonaryong gobyerno apang wala ini ginhatagan sang igtalupangod.
Ini nagadugang sa kalbaryo nga ginapas-an sang mga mangunguma sa tunga sang grabe nga kapigaduhon, kawad-on ukon kakulang sang duta, nagasirit nga presyo sang balaklon apang barato nga sweldo kag ang nagkalain-lain nga mga kalamidad nga nag-igo subong.
Bangud sini, nagapadayon kag wala nagahubas ang suporta sang mga mangunguma sa ila matuod nga hangaway, ang NPA. Sila ang matuod nga nagaserbi sa interes sa sahing ginapigos kag ginahimuslan. Sa pagbinuligay sang pumuluyo kag NPA, malab-ot ang matuod nga kahilwayan, hustisya kag demokrasya para sa bilog pumuluyo.
