Sa umaabot nga Disyembre 10, subling pagadumdumon ang Internasyunal nga Adlaw sa Tawhanong Katungod. Niining tuiga, panawagan sa lain-laing grupo ang pagpanubag kang Ferdinand Marcos Jr, samtang ginapanubag ang kanhing rehimeng Duterte sa mga krimen niini sa katawhan.
Labing bag-o nga krimen sa rehimen ang pagpatay sa mga sakop sa Armed Forces of the Philippines (AFP) kang Honeylet Herrera, minyo, sa Sityo Balogo, Barangay Cristo, Donsol, Sorsogon niadtong Nobyembre 2. Gipasanginlan siya nga may koneksyon sa Bagong Hukbong Bayan (BHB).
Sumala sa BHB-Sorsogon (Celso Minguez Command), panimalos kini sa militar sa mga sibilyan sa komunidad human sa pagsilot sa BHB sa ahente sa paniktik nga si Darius Laya niadtong katapusang semana sa Oktubre. Nalambigit si Laya sa pagluib sa mga silingan ug pagtudlo sa mga sibilyan, lakip si Herrera, nga may koneksyon kuno sa hukbong bayan.
Pag-aresto. Gidakop sa mga sundalo sa 85th IB si Allan Aragon, katutubo nga Manide, sa iyang komunidad sa Barangay Cabatuhan, Labo, Camarines Norte niadtong Nobyembre 20. Wala pa masayod ang mga paryente sa iyang nahimutangan hangtud karon. Human sa pag-aresto, paturagas nga nagpaulan og bala ang 85th IB sa barangay.
Sa Negros Occidental, gidakop sa mga pulis ang usa ka 29-anyos nga alyas “Rafael” sa Barangay Caradio-an, Himamaylan City sa kasong illegal possession of firearms. Gipagawas sa mga pulis nga nakumpiska gikan kaniya ang usa ka improvised o kaugalingong hinimo nga 12-gauge shotgun nga adunay duha ka bala. Gipasanginlan usab siya sa mga pulis isip “kumander sa yunit milisya” bisan og “gipasurrender” na siya kaniadto.
Pagpamig-ot. Sa La Union, gibulabog sa tulo ka elemento sa 5th ID ang balay ni George Cacayuran, presidente sa Timek-Pamalakaya, niadtong Nobyembre 20 sa buntag sa Barangay San Manuel Norte, Agoo.
Sa Rizal, gikumpronta sa mga lumulupyo ug katutubong Dumagat-Remontado sa Barangay San Andres, Tanay, Rizal ang mga sundalo sa AFP sa pagsulong sa ilang komunidad niadtong Nobyembre 26. Plano sa AFP nga gamiton ang yutang kabilin sa mga Dumagat-Remontado isip reserbasyon o kampong militar.
Sa Negros Oriental, duha ka balay ang gipugos pagsulod ug giransak sa 62nd IB niadtong Nobyembre 27. Gisulod ang balay nila Joan Lechan ug sa pamilyang Perolino nga adunay mga bata nga nag-edad og 2- ug 5-anyos sa Sityo Gusa, Barangay Budlasan, Canlaon City. Gihulga ang pamilyang Perolino nga pamatyon kung dili motubag sa ilang interogasyon.
