Sa manug-abot nga Disyembre 10, liwat nga handurawon ang Internasyunal nga Adlaw sang Tawhanon nga Kinamatarung. Sa tuig nga ini, panawagan sang lain-lain nga grupo ang pagsukot kay Ferdinand Marcos Jr, samtang ginapasabat ang anay rehimen Duterte sa mga krimen sini sa pumuluyo.
Pinakaulihi nga krimen sang rehimen ang pagpatay sang mga tinawo sang Armed Forces of the Philipippines (AFP) kay Honeylet Herrera, isa ka iloy sa balay, sa Sityo Balogo, Barangay Cristo, Donsol, Sorsogon sadtong Nobyembre 2. Ginpasibangdan siya nga may angot sa Bagong Hukbong Bayan (BHB).
Suno sa BHB-Sorsogon (Celso Minguez Command), balos-atake ini sang militar sa mga sibilyan sa komunidad sunod sang pagsilot sang BHB sa ahente sa paniktik nga si Darius Laya sadtong ulihi nga semana sang Oktobre. Imbolbado si Laya sa pagtraidor sa mga kababaryo kag pagtudlo sa mga sibilyan, lakip na si Herrera, nga may angot sa hangaway sang banwa.
Pag-aresto. Gin-aresto sang mga soldado sang 85th IB si Allan Aragon, tumandok nga Manide, sa iya komunidad sa Barangay Cabatuhan, Labo, Camarines Norte sadtong Nobyembre 20. Wala pa natultolan sang mga himata ang iya nahamtangan tubtob subong. Sunod sa pag-aresto, patarasak nga nagpaulan sang bala ang 85th IB sa barangay.
Sa Negros Occidental, gin-aresto sang mga pulis ang isa ka 29-anyos nga alyas “Rafael” sa Barangay Caradio-an, Himamaylan City sa kaso nga illegal possession of firearms. Ginpagwa sang mga pulis nga nakumpiskar sa iya ang isa ka improvised ukon kaugalingon nga hinimo nga gauge shotgun nga may duha ka bala. Ginpasibangdan man siya sang mga pulis bilang “kumander sang yunit milisya” bisan pa “ginpasurender na siya sang nagligad.
Pagpang-ipit. Sa La Union, ginbulabog sang tatlo ka elemento sang 5th ID ang balay ni George Cacayuran, tsirman sang Timek-Pamalakaya, sadtong Nobyembre 20 sang aga sa Barangay San Manuel Norte, Agoo.
Sa Rizal, ginkumpronta sang mga residente kag tumandok Dumagat-Remontado sang Barangay San Andres, Tanay ang mga soldado sang AFP sa paglusob sa ila komunidad sadtong Nobyembre 26. Plano sang AFP nga gamiton ang duta nga ginpanubli sang mga Dumagat-Remontado bilang reserbasyon ukon kampo militar.
Sa Negros Oriental, duha ka balay ang pwersa nga ginsulod kag ginpang-ukay sang 62nd IB sadtong Nobyembre 27. Ginsulod ang balay nanday Joan Lechan kag sang pamilya Perolino nga may mga bata nga edad 2 kag 5 ka tuig sa Sityo Gusa, Barangay Budlasan, Canlaon City. Ginpahog ang pamilya Perolino nga imasaker kon indi magsabat sa ila interogasyon.
