Indi magnubo sa tatlo ka patay ang naagum sang mga katapo sang 62nd IB sang ginharas kag ginpalukpan sang M203 grenade launcher sang yunit sang Leonardo Panaligan Command-New People’s Army (LPC-NPA) ang nagatinumpok nga militar sa Sityo Lip-o, Barangay Imelda, Guihulngan City, Negros Oriental sadtong Hunyo 14, alas 3:40 sang hapon. Ang pasistang tropa ang bag-o lang naghalin sa ila operasyon sa mga kalasangan palibot sa baryo.
Suno sa mga residente, ila nahisayran nga ginkarga ang mga patay sa canter truck nga gintabunan sang trapal pasado alas 10:00 sang gab-i, Hunyo 14 kag gindul-ong sa sentro sang syudad. Ginpunggan man sila sa militar nga magkadto sa natabuan sang insidente.
Ang taktikal nga opensiba sang LPC-NPA nga ginlunsar ang kongkreto nga sabat sini sa makatarunganon nga demanda sang pumuluyo batok sa wala untat nga operasyon militar, pagpamahug kag pagperwisyo sang berdugo ka desperadong 62nd IB.
Dako man ini nga tamparus sa makahuluya nga nawong sang Armed Forces of the Philippines (AFP), Philippine National Police (PNP) kag mga paramilitar sini, kag NTF-Elcac nga pasulit-sulit nga nagatikal nga dugmukon kag papason ang NPA kag bug-os nga rebolusyonaryong kahublagan sa Central Negros.
Samtang, pagkatapos sa opensiba sang mga Pulang hangaway daw mga idu-buang nga naghuramentado ang militar kag patarasak nga nagpinalupok kabangdanan sang pagkaigo sang mga puluy-an sang mga mangunguma sa lugar kaangay sang puluy-an ni barangay kagawad Mico sang nasambit nga baryo.
Lubos gid nga ginakundenar sang LPC-NPA ang ini nga katarantaduhan nga ginhimo sang militar sa mga residente sang Sityo Lip-o nga nagtuga sang kahadlok kag kakugmat sa mga inosenteng sibilyan lakip na ang mga menor de edad nga kabataan.
Ginapanawagan man sang LPC-NPA nga kinahanglan ang hugot nga paghiliusa sang mga pumuluyo sa Barangay Imelda kag bug-os nga Guihulnganon paagi sa determinado kag maisog nga pagbuyagyag kag pagpamatok sa mga kalakasan sang pasistang 62nd IB batok sa mga pumuluyo sa kaumhan sang Guihulngan City kag sakop sang Central Negros sa kabilugan.
Subongman, inutil ang rehimen US-Marcos Jr sa pagsabat sa sandigan nga demanda sang pumuluyo nga ipatuman ang matuod nga reporma sa duta kag pungsodnon nga industrialisasyon.
Samtang nagapadayon ang pagpamintas sang pasista kag berdugong militar sa mga kaumahan sang isla, maga-usbong ang paghimakas sang pumuluyo kag magasuporta sa armadong paghimakas tubtob nga magpasakop sa NPA para angkunon ang pungsodnon nga kahilwayan kag demokrasya nga nakabase sa hustisya sosyal.
