Sa kapatagan kag sa mga kabukiran sang Cenral Luzon, nagasagrab ang kadalag-an sang rebolusyonaryong kahublagan sang pamatan-on para panginbabawan ang mga kahuyangan, tadlungon ang mga pagsayop kag labi nga pabaskugon ang kubay sang Kabataang Makabayan (KM) sa rehiyon. Nagapaninguha sila nga lab-uton ang pinakadamo nga pamatan-on kag pandayon sila bilang mga rebolusyonaryo, hangaway kag kumander sang Bagong Hukbong Bayan (BHB), kag kadre sang Partido Komunista ng Pilipinas.

Ginpabakod sang mga myembro sang KM-CL ang plano sini nga isulong kag pamunuan ang rebolusyonaryong kahublagan sang pamatan-on sa rehiyon. Liwat nila nga ginbuksan kag gintun-an ang Katilingban kag Rebolusyon Pilipino (KRP), mga sandigan nga dokumento sang KM kag Partido, mga sinulatan kag gintudlo sang pangulo nga tigtukod sang KM nga si Kaupod Jose Maria Sison, kag ang masangkad nga pagtulun-an sang unibersal nga teorya sang Marxismo-Leninismo-Maoismo. Halin diri, nagkuha sila sang kinaalam kag inspirasyon para tasahon ang kaugalingon nga inagihan kag makaganar sang rebolusyonaryo nga leksyon kag teorya.

Sadtong Oktobre, nagtipon ang mga myembro sang KM sa Pampanga para hiwaton ang pagpanumpa sa bandera kag ginpabakod ang ila panindugan kag katampad sa organisasyon. Ginbalikan man nila ang bug-os tagipusuon nga pagbaton sa linya, programa kag patakaran sang KM, pagsulong sang rebolusyonaryong kahublagan sang pamatan-on nga estudyante sa probinsya, pag-amot sa armadong paghimakas kag pagpanginbabaw sa pungsodnon-demokratiko nga rebolusyon tubtob sa lubos nga kadalag-an. Pagkatapos sini, nagpakigbahin sila sa kolektibo nga pagbungkal sang isa ka ulumhan.

Kabuhi nga ginhalad ni Ka Mabel

Inspirasyon sang KM-Central Luzon sa pagpapagsik sini ang mga martir halin sa kubay sang pamatan-on. Isa diri si Azase Galang (Ka Mabel) nga napatay sadtong Hunyo 26 sa isa ka depensiba nga inaway sa Pantabangan, Nueva Ecija.

Sa lamharon nga edad, kahibalo na si Ka Mabel sa dagway sang pasismo. Ang iya amay ang gin-abdak kag gindula sang mga ahente sang militar sa idalom sang rehimen US-Arroyo. Sadtong 2022, gin-abdak ang iya iloy nga si Maria Elena “Cha” Pampoza sang mga ahente militar.

Nagsugod siya nga maghulag sa kubay sang pamatan-on sadtong 2016. Nagtungod siya sang yabi nga katungdanan sa pagtukod sang asosasyon sang pamatan-on sa probinsya sang Tarlac. Napili siya nga tsirman sini sadtong 2020.

Sa ikaapat ka tuig sa kurso nga Public Administration sa Tarlac State University, nagdesisyon siya nga mangin lubos-panahon nga aktibista sa Central Luzon kag gintalikdan ang iya handum nga mangin abogado. Nagtindog siya nga sekretaryo sang KM sang rehiyon. Sadtong Hulyo 2023, nagdesisyon siya nga mangin hangaway sang BHB.

“Sa likod sang iya seryoso nga nawong, nakatago ang mahumok nga tagipusuon nga permi andam sa paghalad sang oras kag panahon para sa masa, indi ko siya malipatan,” suno kay Echo, isa ka estudyante sadto nga ginrekrut niya sa Tarlac, nga subong bag-o nagsumpa nga katapo sang KM. Madamo pa sang mga pamatan-on nga kasubong ni Echo nga ginhatagan inspirasyon sang kabuhi, sang sakripisyo kag pagpaninguha ni Ka Mabel.

Desisyon ni Ka Aya

Isa si Ka Aya sa subong nga mga organisador sang KM sa rehiyon. Sa sulod sang pila ka tuig nga pagtuon sa isa ka pampubliko nga buluthuan, nangin maathag sa iya nga garuk ang edukasyon sa pungsod. Sa pagtuon sa katilingban Pilipino, nahangpan niya ang gamot sang mga problema nga ini.

sa sulod sang pila ka bulan nga paghulag, naagyan ni Ka Aya ang pasismo sang estado sa mga pamatan-on nga nagapangapin sa kinamatarung sang pumuluyo. Imbes nga mahadlok, mas natulod siya nga labi nga manindugan.

Sa padayon nga paglubog sa kubay sang anakbalhas, nahangpan niya ang mga paghimakas sang lain-lain nga sektor sang katilingban. Lubos niya nga ginhakos ang rebolusyonaryo nga kahublagan sang pumuluyo.

Pila ka tuig ang nagligad, nagdesisyon siya nga ihalad ang bug-os nga panahon bilang isa ka organisador sang mga pamatan-on. Ginbuy-an niya ang petiburges kag komportable nga kabuhi. Nakahibalo siya nga wala sang may nagahulat nga maayo nga buasdamlag para sa pamatan-on nga pareho niya tubtob padayon ang pagpanghimulos kag pagpamigos sa pungsod.

Halin sa Kalayaan Nobyembre 2024, KM-Central Luzon.