Sa usa ka payag sa usa ka nataran sa Southern Tagalog, nagtigum ang pipila ka mga instruktor ug nag-unang instruktor sa pagtuon sa Paaralang Jose Maria Sison (PJMS). Gibati nila ang kahinam nga sugdan na ang pagtuon. Tulo ka klasrum ang magaablihan nianang gabhiona: Ang mga estudyante pagabahinon sa Batakang Proletaryong Baruganan ug Panglantaw sa Rebolusyon, Pulitikanhong Ekonomiya, ug Imperyalismo.
Sulod sa hapit duha ka bulan, nahimong kasagarang panghitabo kini sa matag base sa usa ka yunit sa Bagong Hukbong Bayan (BHB) sa Southern Tagalog. Giablihan sa yunit ang PJMS aron pormal nga sugdan ang Batayang Kurso ng Partido (BKP) alang sa mga myembro sa Partido ug masang aktibista gikan sa gikonsolidar nga mga baryo.
Gilunsad ang BKP sa bahin-bahin isip paghaum sa iskedyul sa masa nga busy sa pagkaingin, pagpangita og panginabuhi o pag-atiman sa mga anak. Kung madugay sa pagsugod sa pagtuon, nagpahaum ang yunit pinaagi sa paglunsad og tigum diskusyon o kultural.
Usahay samtang adunay usa hangtud tulo ka klasrum sa parehong pwesto, aduna pay usa ka tim nga naka-detats aron maghatag og pagtuon sa duul nga mga balay. Positibo nga napunting sa yunit ang dili paghulat o pagpaabot sa ideyal nga sitwasyon aron ilunsad ang pagtuon. Samtang adunay mga hugna sa pagtuon nga giusa ang tanang estudyante, aduna usay kadungan nga paisa-isa o ginangmay ra aron mahuman sa masa ang pagtuon.
Sagol nga mga tigulang, batan-on, lalaki ug babaye, ug usahay kauban pa ang ilang mga anak, ug mga estudyante sa mga pagtuon. Ingonman, adunay mga beterano ug bata sa mga magtutudlo, apan kapin sa katunga niini gikan sa bag-ong henerasyon sa mga kabatan-onan. Nag-usa ang kahanas ug kaalam sa mga magtutudlo nga gikan sa hut-ong mag-uuma ug petiburgesya.
Gilunsad sa yunit ang BKP tungod kay klaro nga gikinahanglang maarmasan ang masa sa mga rebolusyonaryong teorya ug prinsipyo aron atubangon ug suklan ang nagkagrabeng krisis ug ang nagkabangis nga terorismo sa estado sa ilang mga komunidad. Paningkamot usab kini sa pagtubag sa kalihukang pagtul-id sumala sa yunit.
Sa wala pa ang pagtuon, naglunsad ang yunit og duha ka hugna sa BKP Instructor’s Training. Gipaningkamutan sa pagbansay nga iaplikar sa partikular nga kahimtang, kasinatian ug kultura sa masa ang BKP. Importante nga ang mga magtutudlo adunay igong katilingbanong imbestigasyon ug pagsusi sa hut-ong sa lokalidad. Giawhag usab ang mga magtutudlo nga magmamugnaon sa pamaagi sa pagtudlo ug hanas sa paggamit sa mga rebolusyonaryong arte sa mga topiko.
Mitabang ang masa ug milisyang bayan sa pagpangandam sa Hukbo. Kauban sila sa pag-imbitar sa mga estudyante, pagsiguro sa seguridad ug pagpasulod sa gikinahanglang suplay. Gawas pa niini ang sakripisyo sa masa sa pagtambong sa pagtuon nga usahay molungtad hangtud alas-11 sa gabii bisan pa og naay trabaho pagkasunod adlaw. Kung magabin-an, magkuyog nga mag-kape ang masa ug mga Pulang manggugubat aron dili katulgon ang mga magtutudlo ug mga estudyante.
Sa paghuman sa mga pagtuon, dungan nga mikanta ang mga magtutudlo ug estudyante sa lain-laing rebolusyonaryong awit. Sa dili pa mopauli, malipayong naglamano ug nagpanamilit ang masa ug Hukbo sa usag usa uban sa mga pagdapit ug pagtubag sa sunod nga pagtuon. Nagbunga ang mga pagtuon sa pagtukod og usa ka bag-ong sanga sa Partido sa lokalidad.
Diha-diha nasulayan ang kalig-on sa masang nakahuman sa BKP sa dihang giatubang nila ang pasistang atake sa kaaway sa ilang mga baryo ug gisakop sa focused military operation sa AFP. Gipakyas sa ilang panaghiusa ang terorismo sa estado. Dungan sila nga misukol, nga hugot nga kauban ang ilang tinuod nga hukbo.
Gipakita sa aktibong pagsuporta ug pagtambong sa masa sa Paaralang JMS nga ilang gidawat ang pagtul-id sa Partido ug ang ilang kabahinan dinhi. Kinahanglan nga mahimong hagit sa mga rebolusyonaryo—ilabi na sa mga kadre ug myembro sa Partido ug Hukbo—nga ipatagos sa mga lokal nga pwersa ang pagtul-id isip ilang kaugalingong katungdanan aron walay pagduha-duha nga ihalad ang kusog, kaalam ug katakus sa subling pagpakusog sa demokratikong rebolusyon sa katawhan.
