Sa pihak sang mga yamo kag reklamo sang mga pumuluyo sa mga kaumahan sang Central Negros kaangot sa pagpamintas, intimidasyon kag pagpanglusob sang militar sa mga komunidad sang mga mangunguma, padayon ang pasismo nga ginasabwag sang 62nd IB batok sa mga inosenteng sibilyan, sahing mangunguma lakip na ang mga tumandok sa prenteng gerilya.
Muklat nga ila ginalapas ang pangkalibutanon nga kasugtanan sa pagrespeto sa tawhanon nga kinamatarung.
Hunyo 19 alas 10 sa aga—ginlusob sang apat ka nakasibilyan kag armado nga mga katapo sang 62nd IB ang puluy-an ni Mario Noyad, 40 anyos, mangunguma sang Sityo Natae, Barangay Binalbagan, Canlaon City, Negros Oriental. Isa sa apat ka militar ang nagpakilala kay Harry Perez nga Batallion Intelligence Officer sang 62nd IB.
Ginpatu-patuan sang militar si Noyad nga may angot kag supporter sang NPA. Ginapilit siya nga magkooperar sa pagtudlo sang mga katapo sang NPA sa lugar. Ginpahug siya nga patyon kon indi magkooperar. Nagtuga ini sang kahadlok kag kakugmat sa biktima lakip na sang bug-os nga pamilya kag mga kabataan.
Samtang wala-untat ang operasyon militar sa mga sityo sang Mandagum, Tubod, Sumilang, barangay proper, Maka-angkob kag Maculos; tanan sang Barangay Tacpao. Padayon man ang pagpanglusob sang militar sa mga komunidad sang mangunguma sa Sityo Lip-o kag Cambadlis sang Barangay Imelda, mga sityo sang Daat-daat kag Talamban sang Barangay Planas, subongman sa mga Sityo sang Lupo kag Antibalas sang Barangay Humay-humay; tanan sakop sang Guihulngan City.
May 200 man ka tropa sang militar nga nakapakat sa mga binukid sang Binalbagan, Negros Occidental. Nagasaka sa mga panimalay sang mangunguma, nagapanghalit sa mga pananom sang pumuluyo, nagatiner sa mga simbahan kag mga buluthuan. Nagtuga sang kahadlok, kakugmat kag troma sa mga sibilyan lakip na ang mga kabataan.
Suno sa pumuluyo, perwisyo ang presensya sang pasistang militar sa ila mga komunidad.
