Duterte panubagon, Marcos, singilon! Nagtapok ang mga demokratikong organisasyon ug progresibong partido sa Liwasang Bonifacio sa Maynila niadtong Disyembre 10 aron dumdumon ang ika-76 nga Internasyunal nga Adlaw sa Tawhanong Katungod. Ilang gibutyag ang makaluluoy nga kahimtang sa tawhanong katungod sa nasud ilalum sa duha ka magkasunod nga rehimen. Giguba sa mga raliyista ang usa ka effigy nga ilang gitawag og “Mamamayan vs Kasamaan at Kadiliman” nga nagsimbolo sa kadunot sa mga Marcos ug Duterte. Adunay mga susamang protesta sa Bicol, Cebu, Iloilo, Davao ug Baguio.
Impeach Sara! singgit sa mga kabatan-onan sa rali sa Quezon City. Nagprotesta ang mga myembro sa Anakbayan sa Quezon City niadtong Disyembre 8 aron ipanawagan ang pagpalagpot kang Sara Duterte isip bise presidente. Dungan niini, ilang giduso ang pagpanubag sa kanhing presidente nga si Rodrigo Duterte sa iyang mga krimen batok sa kabatan-onan ug katawhan, ug pagpaningil kang Ferdinand Marcos Jr sa inutil ug dunot nga pagdumala sa gubyerno.
Upisyal sa DepEd sa NCR, gikasuhan. Nagpiket atubangan sa upisina sa Ombudsman sa Quezon City niadtong Disyembre 10 ang mga magtutudlo sa pangpublikong eskwelahan sa NCR uban ang pagpasaka og kasong administratibo batok kang Superintendent Rita E. Riddle. Gipasaka batok kang Riddle ang kasong grave misconduct ug grabeng pag-abuso sa awtoridad tungod sa iyang pagpamig-ot ug pagpangharas sa mga magtutudlo. Ang kaso nakasubay sa pagpamig-ot ni Riddle sa protesta sa 200 ka magtutudlo niadtong Mayo 15.
