Walkout sa UP Visayas. Nagmartsa ang masobra 600 ka estudyante sang UP Visayas sa kampos sini sa Miag-ao, Iloilo sadtong Nobyembre 15 agud ipalab-ot sa administrasyon sang unibersidad ang ila mga reklamo kag demanda. Singgit sang lain-lain nga mga grupo, organisasyon kag konseho sa martsa:”Do better UPV!” Ginsanto ang hublag sa paghanduraw sa National Students’ Day kada Nobyembre 17.
Ika-11 nga tuig sang Superbagyo Yolanda. Nagmartsa padulong sa Mendiola ang mga progresibo nga grupo kag mga nakaluwas sa kalamidad sa pagpanguna sang People Surge para handurawon ang ik-11 nga anibersaryo sang Superbagyo Yolanda sadtong Nobyembre 8. Nagapanawagan ang grupo sang hustisya para sa mga nagkalamatay kag nahalitan sang Yolanda sadtong Nobyembre 2013 sa idalum sang rehimen Aquino II. Samtang, may hublag man sa Marikina City sadtong Nobyembre 12 agud dumdumon ang ika-4 nga tuig sang anibersaryo sang bagyong Ulysses.
Lakat-pangamuyo sa Quezon. Ginatos ka mga pumuluyo sang Quezon ang nagpakigbahin sa ginlunsar nga “Lakat-Pangamuyo para sa Kapalibutan, Katarungan kag Kamatuoran” sadtong Nobyembre 8 sa Lucena City. Nakigbahin sa hublag ang mga tawong simbahan, mga grupo nga nagapangapin sa kapalibutan kag iban pa para manawagan nga untaton ang pagpang-kwari kag mapanghalit nga mga proyekto sa probinsya. Nagpadulong ang mga grupo sa kapitolyo para idul-ong ang isa ka petisyon.
Hublag batuk sa climate change kag gyera. Nakig-isa ang mga maki-kapalibutan kag demokratikong organisasyon Pilipino sa ginpatigayon nga Global Day of Action Against Climate and War sadtong Nobyembre 16. Nagpatigayon sila sang protesta sa atubangan sang US sa Manila kon diin gintumod nila ang US bilang numero uno nga may salabton sa climate change kag mga gyera sa bug-os nga kalibutan. Ang hublag kadungan sa pagbukas sang COP29 sa Baku, Azerbaijan.
