Hustisya, gipangayo sa Adlaw sa mga Patay. Nagtigum ang mga pamilya sa mga biktima sa mini nga gubat kontra-droga ubos sa Rise Up for Life and for Rights sa usa ka kumbento sa Quezon City niadtong Nobyembre 2 isip pagsaulog sa Kalag-kalag. Sa samang adlaw, nagtapok ang mga pamilya sa mga desaparesidos sa Bantayog ng mga Bayani sa Quezon City. Mibisita usab sa lubnganan ug nagdagkot og kandila alang sa mga biktima sa pulitikanhong pagpatay ang mga pamilya ug tsapter sa Karapatan sa lain-laing rehiyon ug prubinsya
Niadtong Oktubre 28, nagpiket ang maong mga grupo atubangan sa Senado aron ipanawagan ang pagkiha kang Rodrigo Duterte nga kaniadto maoy nag-unang bisita sa gipahigayong pagdungog sa “gubat kontra-droga” sa iyang rehimen.
Piket batok sa plantasyon sa oil palm sa Negros, gipahigayon. Nagpiket ang mga mag-uuma sa Negros Occidental ubos sa pagpangulo sa KMP-Negros ug NFSW-Negros niadtong Oktubre 30 atubangan sa kapitolyo sa prubinsya sa Bacolod City. Gipanawagan nila sa gubernador nga mobarug batok sa plantasyon sa oil palm sa lungsod sa Candoni ug giduso nga hatagan og suporta ang mga naapektuhan sa tyempo muerto o patay nga panahon.
Gatusan ka kabatan-onang Pilipino, nagtigum sa kumperensya sa US. Nagtapok gikan sa lain-laing bahin sa United States ang mga kabatan-onang Pilipino sa ilang gilunsad nga ikatulong Kabataan Magkaisa Conference ug kinatibuk-ang asembleya sa Kabataan Alliance niadtong Oktubre 5-6 sa University of California sa Los Angeles, USA. Kapin 450 ka kabatan-onan gikan sa 113 ka organisasyon ang mitambong sa maong panagtigum. Gihisgutan sa kumperensya ang mga isyung katilingbanon ug kahimtang sa mga Pilipino sa Pilipinas ug sa gawas sa nasud.
