Nagmadaugon ang reporter nga si Alfonso Tomas “Atom” Araullo sa kasong sibil nga iyang gipasaka batok sa mga personahe sa National Task Force-Elcac nga silang Lorraine Badoy-Partosa ug Jeffrey Celiz tungod sa ilang pagpang-red-tag. Gipabayad si Badoy ug Celiz og ₱2.08 milyon isip danyos tungod sa perwisyong ilang gihimo kang Araullo. Girepresentahan siya sa mga abogado gikan sa Movement Against Disinformation.

Gipasaka ni Araullo ang maong kaso niadtong Setyembre 2023 tungod sa walay hunong nga pagpangdaut ug pagpakaylap sa duha og mga bakak sa ilang programa sa telebisyon sa SMNI ug social media. Sa kasong gisang-at, giingon nga gilapas sa duha ang katungod ni Araullo nga nagresulta sa seryosong kadaut ug epekto sa iyang reputasyon, kalinaw sa hunahuna, ug mga personal nga relasyon.

Sa desisyon sa korte, gisulti niining giabuso sa duha ang kagawasan sa pagpadayag pinaagi sa pag-red-tag nila kang Araullo. Kini ang kinaunhang desisyon sa usa ka korte mahitungod sa maong matang sa kaso.

Gigamit ang desisyon gikan sa Korte Suprema isip basihan nga nagsulting ang “red-tagging, pagdaut sa dungog, pag-akusa, ug pagtratong sad-an tungod sa pagkalambigit nahimong hulga sa katungod sa usa ka tawo sa kinabuhi, kagawasan, o seguridad.”

Samtang, matawag usab nga kadaugan ang kolektibong aksyon sa katawhan ang giaprobahang mga ordinansa gikan sa lokal nga konseho sa Naga City ug Baguio City batok sa Red-tagging ug uban pang porma sa intimidasyon ug kabangis batok sa mga tigpanalipud sa tawhanong katungog.