Lubos nga kapagsik naton nga dayawon ang nagahilapit nga ika-60 nga anibersaryo sang Kabataan Makabayan sa Nobyembre 30. Magbalik tan-aw kita sa indi mapanubo nga amot sini sa kasaysayan sang pungsodnon-demokratiko nga paghimakas sang pumuluyong Pilipino. Labi nga malahalon, lantawon naton ang mas dako pa kag krusyal nga maamot sang Kabataang Makabayan kag sang rebolusyonaryong kahublagan pamatan-on sa nagapadayon nga paghimakas para pukanon ang imperyalismo, pyudalismo kag burukrata kapitalismo, kag lab-uton ang pungsodnon kag kahilwayan sosyal.
Itigana naton ang okasyon nga ini para hatagan sang pinakataas nga pasidungog si Kaupod Jose Maria Sison, tagpangulo nga tigtukod sang KM kag sang Komite Sentral sang Partido, sa iya militante kag maisog nga rebolusyonaryo nga pagpamuno. Hatagan man naton sang pagsaludo ang tanan nga nangin baganihan kag martir nga ginbun-ag sang KM, nga madamo ang nangin nagapamuno nga mga kadre sang Partido, mga Pulang hangaway kag kumander sang Bagong Hukbong Bayan (BHB), kag nagserbe nga mga organisador sang rebolusyonaryong kahublagan masa sa kasyudaran kag kaumhan.
Ang pagtukod sang KM, anum na ka dekada ang nakaligad, sa adlaw sang pagkabun-ag sang baganihan nga si Andres Bonifacio, makasaysayanon nga ginsiguran sa pagpapagsik liwat sa nauntat nga paghimakas para sa pungsodnon nga kahilwayan. Ginwagayway sang KM ang Pula nga bandera kag ginkilala ang kakinahanglanon nga liwat usoyon ang banas sang armadong rebolusyon para lab-uton ang gatusan ka tuig nga handum sang pungsod para sa pungsodnon nga kahilwayan.
Maukod nga nagtuon sang Marxismo-Leninismo-Maoismo ang mga katapo sang KM bilang syentipiko nga moda sang panghuna-huna, kag gingamit ini para analisahon, ibuyagyag kag batikuson ang mapiguson kag mahimuslanon nga kahimtangan sang pumuluyo sa idalum sang mala-kolonyal kag mala-pyudal nga sistema sa Pilipinas. Nagapanawagan ini sa banwa nga ipakigbato ang himpit nga kahilwayan kag demokrasya, pungsodnon nga industriyalisasyon kag matuod nga reporma sa duta.
Pursigido nga nagpropaganda ang KM sa mga pamatan-on kag masa, nagtukod sang mga tsapter kag naglunsar sang mga aksyon masa dala ang maki-pungsodnon kag demokratiko nga panawagan. Halin sa puluan kag ginatos, nangin puluan ka libo nga pamatan-on ang nakigbahin sa mga demonstrasyon sa kadalanan nga ginpangunahan sang KM nga nagtay-og sa kalig-on sang neokolonyal nga estado nga nagbalhin sa paggamit sang pasistang pagpangsumpo.
Ang pagtukod sang KM sadtong 1964 nagserbe nga paghanda para sa liwat nga pagtukod sang Partido Komunista sang Pilipinas sadtong 1968. Ginhanas sang KM ang mga proletaryong rebolusyonaryo nga magtukod sang una nga taludtod sang Partido. Paagi sa KM, naseguro sang sadto bag-o tukod nga Partido nga malapad nga nakaugat ini sa kubay sang masang mamumugon, mangunguma, malaproletaryado kag iban pa nga pigos nga sahi kag sektor. Gin-ani sang Partido ang linaksa nga binhi nga ginsab-og sang KM agud isulong ang demokratikong rebolusyon sang banwa sa bug-os nga pungsod.
Sang ginpatuman ni Marcos Sr ang laye militar sadtong 1972, napwersa nga maghulag sang likom ang KM agud padayon nga mag-organisa sa kasyudaran, samtang madamo man ang nagkadto sa kaumhan agud magpakigbahin sa kahublagan mangunguma kag sa armadong paghimakas. Isa ini sa una nga nagbug-os sang National Democratic Front nga nagpanguna sa paghugpong sang pumuluyo batuk sa diktaduryang Marcos. Paagi sa pursigido nga pagpakig-away, amat-amat nga liwat nabuksan ang hayag nga patag sang pakig-away nga sang ulihi nagbulwak sa mga welga kag mga aksyon protesta, nga nagdangat sa pagpabagsak sa tiraniya.
Sa nagligad nga mga dekada, ang KM nagserbe nga hugot nga katimbang sang Partido sa pag-abaga sang mga katungdanan sa pagsulong sang pungsodnon-demokratiko nga rebolusyon. Paagi sa KM, katimbang ang BHB kag iban pa nga rebolusyonaryong organisasyon masa, tayuyon nga nagakadugangan sang preska nga dugo ang Partido kag pat-ud nga permi ini mapagsik kag matutom.
Nangin kabulig sang Partido ang KM sa Ikaduha nga Dungganon nga Kahublagan Panadlong sadtong 1992 sa pagsikway kag pakigbato sa mga elemento nga nagtraidor sa Partido, kag nagtilaw nga ilihis ang rebolusyonaryong kahublagan, kon indi man sa dalan sang repormismo, sa dalan sang adbenturismo. Ginbulag sang mga dis-oryentasyon nga ini ang kahublagan pamatan-on sa kahublagan masa kag sa armadong paghimakas, kag amat-amat nga ginpahuyang ang KM kag bug-os nga kahublagan pamatan-on. Sa pagpanadlong, liwat nga ginpabaskog ang KM bilang kumprehensibo nga rebolusyonaryong organisasyon. Sa nagligad nga mga dekada, nagpabilin nga bubon ang KM sang bag-o nga mga kadre sang Partido kag bag-o nga mga Pulang hangaway sang BHB.
Katimbang ang KM, segurado ang Partido nga magmadinalag-on ang subong nga malapad nga kahublagan panadlong kag sa pag-usoy sa banas sang liwat nga pagsulong. Dapat padayon nga pabaskugon ang KM agud pahulagon ang mga pamatan-on sa banas sang pungsodnon-demokratiko nga paghimakas. Dapat pursigido nga isikway ang mga makahalalit nga panghuna-huna kag gawi nga petiburges, lakip ang liberalismo, ultra-demokrasya, anarkismo, kag iban pa nga mga konseptong ginpalapta sang burgesya nga sobra nga nagapadako sang indibidwalismo kag nagabulag sa ila sa masa.
Sa tunga sang krisis sang nagahari nga sistema, katungdanan sang KM kag sang pungsodnon-demokratikong mga pwersa nga malaparan nga pukawon ang mga pamatan-on kag estudyante, hugpungon ang ila kubay, kag madamuan sila nga pahulagon sa banas sang pakig-away. Dapat tukuron ang KM, upod ang iban pa nga mga rebolusyonaryong organisasyon masa, sa tanan nga lugar nga yara ang mga pamatan-on. Ginasigahum nga ang mga pamatan-on aktibo nga magpakigbahin sa mga pungsodnon nga paghimakas batuk sa pasismo kag terorismo sang estado, maki-dumuluong nga patakaran pang-ekonomiya, pagpasilabot militar sang US, imperyalistang pagpangsulsol sang gyera, kag sa mga demokratikong paghimakas sang masang mamumugon, mangunguma kag iban pa nga sektor.
Tungod nagapadayon ang pagpamigos kag pagpanghimulos sa pumuluyong Pilipino sang imperyalismong US, kabulig ang mga burgesya kumprador, agalon mayduta kag mga burukrata kapitalista sa idalum sang pasistang rehimen US-Marcos, nagapabilin nga basehan para padayon nga palaparon kag pabaskugon ang Kabataan Makabayan. Samtang indi pa masolbar kag nagalala nga nagalala ang krisis sang pungsodnon nga sistemang kapitalista, kag sang mala-kolonyal kag mala-pyudal nga sistema sa Pilipinas, mas kinahanglanon nga isulong ang paghimakas para sa pungsodnon nga demokrasya, paagi sa pangmalawigon nga inaway banwa.
Taas pa kag tunukon ang dalan nga usoyon, madamo pa ang kinahanglan nga himuon nga sakripisyo para isulong ang mabudlay nga paghimakas para sa pungsodnon nga demokrasya. Nagasalig ang Partido nga magapabilin nga malig-on sini nga kabulig ang KM, upod sa iban pa nga mga rebolusyonaryong organisasyon masa, sa pagsulong kag pag-agum sang mga kadalag-an.
