Nagmartsa sa Recto Avenue sa Maynila ang mga myembro sa Kabataang Makabayan (KM) niadtong Disyembre 16 isip pagsaulog sa ilang ika-60 nga anibersaryo ug ikaduhang tuig sa pagkamartir ni Kaubang Jose Maria Sison. Sa tunga-tunga sa daghang tawo, mapangahason nga gisinggit sa mga myembro sa KM ang panawagan sa katawhan nga mosalmot sa gubat sa katawhan.
Sa pipila ka minutong programa, nang-awhag ang KM nga ibagsak ang mga Marcos ug Duterte taliwala sa ilang burukrata-kapitalistang panag-away. Gikondena nila ang rehimen sa pag-usik-usik niini sa minilyong piso alang sa terorista ug pasistang kampanya batok sa kabatan-onan ug katawhan samtang gikibhangan ang pondo alang sa katilingbanong serbisyo.
Sa miaging duha ka semana, naglunsad og Oplan Pinta-Oplan Dikit ang mga balangay sa KM sa nagkalain-laing unibersidad ug komunidad sa Metro Manila, Baguio City, Quezon, Cebu, Iloilo ug uban pang mga prubinsya aron saulugon ang ilang anibersaryo niadtong Nobyembre 30. Samtang, nagpagula ang KM-Central Luzon og espesyal nga isyu sa Kalayaan para dinhi.
Gipalanog niini nga mga aktibidad ang panawagan sa KM ngadto sa mga kabatan-onan nga mosalmot sa Bagong Hukbong Bayan ug pakyason ang pagsulay sa rehimeng US-Marcos nga pukanon ang rebolusyonaryong kalihukan sa nasud.
Parangal kang Ka Joma. Niadtong Disyembre 15, naglunsad og aktibidad ang pamilya, mga kauban ug higala ni Kaubang Jose Maria Sison sa Utrecht, Netherlands aron dumdumon ang ikaduhang tuig sa iyang pagkamartir. Gipasiugdahan sa JMS Legacy Foundation ang panagtigum sa temang “Ang Gabay: Pag-alala ug pagpapatuloy sa legasiya ni Jose Maria Sison.” Aron makatambong ang uban pang mga kauban gikan sa Pilipinas, dungan nga gilunsad ang online meeting.
