Nagmartsa sa Recto Avenue sa Manila ang mga katapo sang Kabataang Makabayan (KM) sadtong Disyembre 16 bilang pagdumdom sa ila ika-60 nga anibersaryo kag ikaduha ka tuig sang magkamartir ni Kaupod Jose Maria Sison. Sa tunga sang matawo nga lugar, makahas nga ginsinggit sang mga katapo sang KM ang panawagan sa pumuluyo nga makigbahin sa inaway banwa.
Sa pila ka minuto nga programa, nagpanawagan ang KM nga ibagsak ang mga Marcos kag Duterte sa tunga sang ila burukrata-kapitalista mga banggaan. Ginkundenar nila ang rehimen sa paggasto sini sang minilyon ka piso para sa terorista kag pasista nga kampanya batuk sa pamatan-on kag pumuluyo samtang ginakaltasan ang para sa serbisyo pangkatilingban.
Sa nagligad nga duha ka semana, ginlunsar sang mga sanga sang KM sa nagkalain-lain nga unibersidad kag komunidad sa Metro Manila, Baguio City, Quezon, Cebu, Iloilo kag iban nga probinsya ang Oplan Pinta-Oplan Dikit para dumdumon ang ila anibersaryo sadtong Nobyembre 30. Samtang, nagbalhag sang ispesyal nga isyu sang Kalayaan ang KM-Central Luzon para diri.
Ginpalanog sang KM sa mga aktibidad sini ang panawagan sa mga pamatan-on nga magpatapo sa Bagong Hukbong Bayan kag paslawon ang pagtilaw sang rehimen US-Marcos nga papason ang rebolusyonaryong kahublagan sa pungsod.
Pasidungog kay Ka Joma. Sadtong Disyembre 15, naglunsar sang aktibidad ang pamilya, mga kaupod kag abyan ni Kaupod Jose Maria Sison sa Utrecht, the Netherlands agud dumdumon ang ikaduha ka tuig sang iya pagkamartir. Ginpangunahan ang pagtililipon sang JMS Legacy Foundation nga may tema nga “Ang Gabay: Pag-alala at pagpapatuloy sa legasiya ni Jose Maria Sison (Ang Ubay: Pagdumdom kag pagpadayon sa legasiya ni Jose Maria Sison).” Para makapakigbahin ang iban nga mga kaupod halin sa Pilipinas, kadungan nga ginlunsar ang isa ka online nga pagtililipon sa amo nga adlaw.
