Tumang kadasig natong saulugon ang umalabot nga ika-60 nga anibersaryo sa Kabataang Makabayan (KM) sa Nobyembre 30. Magbalik-lantaw kita sa dili matungkad nga tampo niini sa kasaysayan sa nasudnon-demokratikong pakigbisog sa katawhang Pilipino. Labing mahinungdanon, ilhon nato ang mas daku ug krusyal pang matampo sa KM ug sa rebolusyonaryong kalihukan sa kabatan-onan sa nagapadayong pakigisog aron ibagsak ang imperyalismo, pyudalismo ug burukrata-kapitalismo, ug kab-uton ang nasudnon ug katilingbanong paglingkawas.
Atong igahin ang maong okasyon para hatagan sa pinakataas nga parangal si Kaubang Jose Maria Sison, founding chairman sa KM ug sa Komite Sentral sa Partido, sa iyang militante ug maisugong rebolusyonaryong pagpangulo. Pasidunggan usab nato ang tanang nahimong bayani ug martir nga gihimugso sa KM, nga kadaghanan nahimong nangulong mga kadre sa Partido, mga Pulang manggugubat ug kumander sa Bagong Hukbong Bayan (BHB), ug nagsilbing mga organisador sa rebolusyonaryong kalihukang masa pareho sa kasyudaran ug kabanikanhan.
Ang pagtukod sa KM, unum ka dekada na ang milabay, sa adlawng natawhan sa bayaning si Andres Bonifacio, ang makasaysayanong sinugdanan sa subling pagpalagsik sa naputol nga pakigbisog alang sa nasudnong kagawasan. Gikaway-kaway sa KM ang Pulang bandera ug giila ang kapanginahanglan nga subling baktason ang dalan sa armadong rebolusyon aron kab-uton ang gatusan ka tuig nang tinguha sa katawhan alang sa nasudnong kagawasan.
Makugihong gitun-an sa mga myembro sa KM ang Marxismo-Leninismo-Maoismo isip siyentipikong moda sa panghunahuna, ug gigamit kini aron tukion, ibutyag ug batukan ang madaugdaugon ug mapahimuslanong kahimtang sa katawhan ilalum sa semikolonyal ug semipyudal nga sistema sa Pilipinas. Nanawagan kini sa katawhan nga pakigbisugan ang hingpit nga kagawasan ug demokrasya, nasudnong industriyalisasyon ug tinuod nga reporma sa yuta.
Makanunayong nagapropaganda ang KM sa mga kabatan-onan ug masa, nagtukod og mga tsapter ug naglunsad og mga aksyong masa dala ang makinasudnon ug demokratikong mga panawagan. Gikan napuluan ug gatusan, nahimong liboang kabatan-onan ang misalmot sa mga demonstrasyon sa kadalanan nga gipangunahan sa KM nga mitay-og sa neokolonyal nga estado nga migamit og pasistang pagpanumpo.
Ang pagtukod sa KM niadtong 1964 nagsilbing pagpangandam alang sa subling pagtukod sa Partido Komunista ng Pilipinas niadtong 1968. Gibansay sa KM ang mga proletaryong rebolusyonaryo nga mitibuok sa unang dugukan sa Partido. Pinaagi sa KM, nasiguro sa kanhi bag-ong tukod nga Partido nga lapad kining nakaugat sa han-ay sa masang mamumuo, mag-uuma, semiproletaryado ug uban pang dinaugdaug nga hut-ong ug sektor. Giani sa Partido ang liboan nga binhing gisabwag sa KM aron iasdang ang demokratikong rebolusyon sa katawhan sa tibuok nasud.
Dihang gipahamtang ni Marcos Sr ang balaod militar niadtong 1972, napugos nga molihok sa tago nga pamaagi ang KM aron padayon nga mag-organisa sa kasyudaran, samtang daghan usab ang misaka sa kabanikanhan aron mosalmot sa kalihukang mag-uuma ug armadong pakigisog. Usa kini sa unang naglangkub sa National Democratic Front nga nanguna sa paghugpong sa katawhan batok sa diktaduryang Marcos. Pinaagi sa maisugong pagsukol, hinay-hinay nga subling naablihan ang dayag nga natad sa pagsukol nga natransporma ngadto sa mga welga ug mga aksyong protesta, nga misangpot sa pagpalagpot sa tiranya.
Sa milabayng mga dekada, ang KM nagsilbing hugot nga kaabag sa Partido sa pag-abaga sa mga tahas sa pagpaasdang sa nasudnon-demokratikong rebolusyon. Pinaagi sa KM, katimbayayong ang BHB ug uban pang rebolusyonaryong organisasyong masa, padayon nga napun-an og lab-as nga dugo ang Partido ug nasiguro nga kanunay kining lagsik ug baskog.
Nahimong kaabag sa Partido ang KM sa Ikaduhang Bantugang Kalihukang Pagtul-id niadtong 1992 sa pagtul-id ug pagbatok sa mga elementong miluib sa Partido, ug nagsulayng isimang ang rebolusyonaryong kalihukan, sa dalan man sa repormismo o sa adbenturismo. Gihimulag sa maong mga disoryentasyon ang kalihukang kabatan-onan sa kalihukan sa batakang masa ug sa armadong pakigisog, ug hinay-hinay nga gipahuyang ang KM ug tibuok kalihukan sa kabatan-onan. Sa pagtul-id, subling gipakusog ang KM isip kumprehensibong rebolusyonaryong organisasyon. Sa milabayng mga dekada, nagpabiling tinubdan ang KM sa bag-ong mga kadre sa Partido ug bag-ong mga Pulang manggugubat sa BHB.
Kaabag ang KM, sigurado ang Partido nga magmalampuson ang kasamtangang malukpanong kalihukang pagtul-id ug sa pagbaktas sa dalan sa subling pag-abante. Kinahanglang padayon nga pakusgon ang KM aron palihukon ang mga kabatan-onan sa dalan sa nasudnon-demokratikong pakigisog. Kinahanglang determinadong tul-iron ang mga makadaut nga petiburges nga panghunahuna ug aktitud, lakip ang liberalismo, ultra-demokrasya, anarkismo, ug uban pang mga konseptong ginapakaylap sa burgesya nga labing nagpadaku sa indibidwalismo ug naghimulag kanila sa masa.
Taliwala sa krisis sa nagharing sistema, tahas sa KM ug sa nasudnon-demokratikong mga pwersa nga malukpanong pukawon ang mga kabatan-onan ug estudyante, hugpungon ang ilang han-ay, ug dinaghan silang palihukon sa dalan sa pakigbisog. Kinahanglang tukuron ang KM, uban ang lain pang rebolusyonaryong organisasyong masa, sa tanang lugar diin adunay mga kabatan-onan. Gilauman ang mga kabatan-onan nga aktibong mosalmot sa mga pakigbisog sa katawhan batok sa pasismo ug terorismo sa estado, maki-langyaw nga mga palisiya sa ekonomiya, interbensyong militar sa US, hulga sa imperyalistang gera, ug sa mga demokratikong pakigisog sa masang mamumuo, mag-uuma ug uban pang sektor.
Tungod kay nagpadayon ang pagpangdaugdaug ug pagpahimulos sa katawhang Pilipino sa imperyalismong US, uban sa mga burgesya-kumprador, agalong yutaan ug mga burukratang kapitalista ilalum sa pasistang rehimeng US-Marcos, nagpabilin ang basihan aron padayon nga palapdon ug pakusgon ang Kabataang Makabayan. Samtang dili masulbad ug nagkagrabe ang krisis sa kalibutanong sistemang kapitalista, ug sa semikolonyal ug semipyudal nga sistema sa Pilipinas, labaw nga gikinahanglang iasdang ang pakigbisog alang sa nasudnong demokrasya, pinaagi sa malungtarong gubat sa katawhan.
Taas pa ug tunukon ang dalan nga pagalatason, daghan pa ang gikinahanglang himuong sakripisyo aron iasdang ang malisud nga pakigisog alang sa nasudnong demokrasya. Salig ang Partido nga magpabiling lig-on niining kaabag ang KM, duyog sa uban pang mga rebolusyonaryong organisasyong masa, sa pag-asdang ug pagkab-ot sa mga kadaugan.
