Nakabalik na sa Pilipinas ang biktima sa human trafficking nga si Mary Jane Veloso, human sa halos 15 ka tuig nga pagkabilanggo sa Indonesia. Gisugat siya sa iyang mga anak, ginikanan, abugado, ug mga tigsuporta gikan sa Migrante Philippines ug Save Mary Jane Task Force sa airport sa kaadlawon niadtong Disyembre 18. Gitugutan siyang paspas nga magakos ang iyang mga anak ug igsuon pag-abot niya sa Correctional Institution for Women sa Mandaluyong City. Panawagan nila sa rehimeng Marcos nga hatagan si Veloso og clemency o pasaylo ug tugutan siyang makapauli sa iyang pamilya.
Sama sa minilyong Pilipinong migrante, nagsugod ang istorya ni Veloso sa dihang nagdesisyon siyang mag-abrod niadtong 2010 aron mahatagan og maayong kaugmaon ang iyang duha ka anak. Gisaaran siya sa iyang rekruter nga si Maria Kristina Sergio og trabaho isip katabang sa Malaysia. Pag-abot niya sa Malaysia, giingnan siya nga aduna nay nakakuha sa iyang trabaho ug gisaaran og laing trabaho.
Samtang naghulat, gisugo siya ni Sergio nga moadto sa Indonesia ug gihatagan og maleta nga magamit alang sa byahe. Wala siya’y kasayuran nga nakatago sa maleta ang 2.6 kilo nga heroin (gibawal nga droga) ug nadiskubre kini sa mga pulis pag-abot niya sa Yogyakarta, Indonesia. Dayon siyang gikasuhan sa Indonesia ug paspas nga nahukman sa silot nga kamatayon. Gitakda ang pagpatay kaniya pinaagi sa firing squad niadtong Abril 19, 2015.
Sa padayon nga kampanya sa Migrante ug mga progresibong organisasyon ug abogado, uban ang iyang pamilya, napugngan ang pagpatay kang Veloso niadtong 2015.
Gisalamin ni Veloso ang kalisud ug mga pakigbisog sa daghang Pilipinong migrante nga nakasinati og pagpahimulos ug pagpangdaugdaug sa gawas sa nasud, dili luwas nga mga kondisyon sa trabaho, istriktong lanyawng sistema sa korte ug kawalay suporta gikan sa gubyernong Pilipino. Dili moubos sa 49 ka migranteng Pilipino ang nag-atubang og silot kamatayon sa ubang nasud, kadaghanan kanila may kalabutan sa iligal nga droga.
Niining 2024, adunay 2,457 ka migrante ang nataho sa Department of Migrant Workers nga nakabilanggo sa lain-laing bahin sa kalibutan. Dinhi, 46 ka kaso lamang ang napadaug sa mga abogado gikan sa Pilipinas ug 204 ang napildi.
