Ginsunog sang isa ka yunit sa Romeo Nanta Command-New People’s Army (RNC-NPA) ang duha ka dump truck kag isa ka backhoe sa Sityo Medel, Barangay Carabalan, Himamaylan City, Negros Occidental, sadtong Hulyo 4, 2025 sang gab-i. Nagbalor ang ekwipo sang masobra 11 milyones ka pesos. Ini nga kwari ginpanag-iyahan ni Barangay Captain Mildred Titular sang amo man nga barangay.

Malawig na nga problema sa pumuluyo ang nasambit nga kwari bangud sa iya halit sa Paniplan River. Bangud sa tinuig nga pagkalot sa lugar, nagadalom ang suba rason nga ang mga talamnan kag uma sa palibot nadulaan na sang tubig kag naapektuhan ang pangabuhian sang mga mangunguma kag mamumugon sa uma sa lugar. Magluwas pa sini, nangin mabudlay na tabukon sa mga residente ang suba bangud sa kadalom.

Madumduman nga sadtong 2021 ginpilit ang mga pumuluyo nga papirmahon sang FPIC (Free, Prior and Informed Consent) para mapasugtan ang kwari sa lugar. Gamit ang pagpamahog sang 94th IB kag pagpanginto paagi sang kwarta, naduso ang pagkalot sa suba sang Paniplan. Gani, antes sa sini nga pagsilot, aktibo ang mga tropa sang 94th IB nga nagabantay sa operasyon sang kwari bisan pa man nga madamo na ang mga reklamo sang pumuluyo sa lugar.

Ini nga akto sang RNC-NPA nagsirbe nga pagpaandam sa mga kompaniya kag indibidwal nga indi maghimo nga pagalapakan ang tawhanong kinamatarong kag pangabuhian sang pumuluyo kabaylo sang ganansya.

Pagpaandam man ini sa mga may kwari, mina, kag iban pang makahalalit sa pangabuhi sang pumuluyo kag kinaiyahan nga indi magapangduha-duha ang rebolusyonaryong kahublagan nga magsilot sini. Kinahanglan sila nga magpaidalom kag magrespeto sa nagalungtad nga rebolusyonaryong gobyerno.

Ang nagatindog nga Pulang gahum sa kabukiran pirmi nga magapanukot sang hustisya para sa mga biktima sang pagpanghimulos kag pagpamigos.