Ginpahug sang mga katapo sang #DiMasaligan79IB para indi magtambong sang rali protesta kontra korapsyon ang mga myembro sang asosasyon sang mamumugon sa kampo sa Barangay Caduhaan, Cadiz City, Negros Occidental kagahapon, Oktobre 21.
Ini matapos nga nag-abot ang mga pasistang soldado sakay sang isa ka Reo trak sa nasambit nga barangay kag ginpatawag ang mga myembro para punggan sila nga makigbahin sa rali para sa pagsaulog sang Bulan sang mga Pesante sa Bacolod City, Negros Occidental.
Magluwas sini, upod sang #DiMasaligan79IB ang agalon mayduta sa lugar nga si Ricky Abdon kag traidor sang rebolusyon nga alyas ‘Jake’ sa sina nga adlaw. Ginhambalan ni Abdon kag mga soldado ang mga myembro nga indi magpetisyon sa ila gintalauma.
Bangud sini, nakabatyag sang kakugmat ang mga myembro sa amo nga hitabo.
Dugang ini nagahublas sa matuod nga kolor sang #DiMasaligan79IB nga sila nagaprotektar kag nagaserbisyo sa interes sang mga agalon mayduta.
Bayolasyon man sang tawhanon nga kinamatarung ang ginhimo sang nasambit nga militar sa pagpugong sang mga myembro sa pagpakigbahin sa protesta sa sina nga adlaw.
Wala sang iban nga tinutuyo ang mga myembro kundi ang mapalab-ot sa dalanon ang ila singgitan nga pagpasabat sang reaksyonaryong gobyerno sa lapnagon nga korapsyon sang mga flood control proyekto samtang nagaantus sila sa tuman nga kapigado, kawad-on sang duta, kakulang sa serbisyo sosyal kag iban pa.
