Hugot nga ginakundenar sang Armando Sumayang Jr Command-New People’s Army (ASJC-NPA) ang mga kalakasan kag kalapasan sa tawhanon nga kinamatarung kag internasyunal nga makitawhanon nga laye sang berdugong militar, kapulisan, CAFGU kag masupog nga mga traydor sang rebolusyon sa sur nga bahin sang Negros.
Sining Mayo, nahunosan sang kabuhi ang pito ka mga Pulang hangaway sa isa ka “overkill” nga operasyon sang 15th, 47th kag 11th IB sa Barangay Tapi, Kabankalan City, Negros Occidental.
Responsable man ang 15th IB sa pagpatay sa isa ka hors de combat sa Barangay Camindangan, Sipalay City, Negros Occidental sadtong Enero. Subongman, ang ila brutal nga pagpatay sa lima ka mga Pulang hangaway samtang nagbyahe sa dalanon sa Barangay Tabugon, Kabankalan City, sadtong 2023.
Sa ini nga hinimoan sang Armed Forces of the Philippines (AFP), maathag kon ngaa daw mga ido buang ang mga tropa sini nga nagabayolar sa internasyunal nga laye sang gyera. Ginakomiter man sang pasistang tropa ang pagpanglapas sang tawhanon nga kinamatarung batok sa pumuluyo pareho sang pagpamatay, pagpamomba, pagpamahug, patarasak nga pagpaniro, pagpangastigo, pilit nga pagpasurender kag iban pa.
Ini nga mga kalakasan maathag nga nagapanindugan sila sa interes sang mga nagapanghimulos nga sahi ilabi na nga ang sur nga bahin sang Negros mangin pugad sa mga higante nga proyekto sang mga dumuluong nga kapitalista kahimbon ang mga burukrata kapitalista kag dalagku komprador burgesya sa pagpatuman sang neoliberal nga mga polisiya sang mga imperyalista nga pungsod.
Nagapamatuod sini ang natabo nga engkwentro sa tunga sang ASJC-NPA kag sa kombinado nga mga tropa sang 15th kag 47th IB sa Barangay Gatuslao, Candoni, Negos Occidental sang nagligad Nobyembre 2024. Namartir ang walo ka mga Pulang hangaway bangud sa ila pagpangapin sa interes sang mga mangunguma kag tumandok nga apektado sa masobra 6,000 ka ektarya nga plantasyon sang oil palm.
Indi lipod sa mga pumuluyo sa ini nga bahin sang isla nga ang ini nga mga nagapangkawkaw nga proyekto nagadislokar sa pangabuhi kag puluy-an kag nagahatag peligro sa kabuhi sang mga pumuluyo.
Sa ka desperado sang AFP, gingamit nila ang kontra-gerilya nga taktika sa pagpatuhaw sang mga traydor kag surrenderees nga ila gina-ulipon kag ginahimo nga tawo-tawo sang humayan batok sa rebolusyonaryo nga pwersa.
Halin pa sang 2020 nga ginhimo sa AFP ang kampanya sa madamuan kag pilit nga pagpasurender sa pumuluyo paagi sa pagpamahug nga patyon kon indi magsurender, pagtanyag sang kwarta kag maayo nga kabuhi kon magkooperar sa ila.
Diri sa larangan sang sur, nagtuhaw ang mga masupog nga traydor kag surrenderees kaangay nanday “Ka Bubbles”, “Ka Coco kag Aya”, “Ka Joel”, “Ka Kian”, “Ka Jumong” kag iban pa. Sila ang mga wala nagremolde sa kaugalingon kag nangibabaw ang kaugalingon nga interes kag gintraydoran ang pareho nila nga pigado kag ginahimuslan man.
Apang bisan pa sini, indi gid nila mawasak ang rebolusyonaryong kahublagan sa isla sang Negros ilabi na sa sur nga bahin. Sa baylo, mas magadamo pa ang mga rebolusyonaryo nga pwersa nga padayon nga nagapangita sa matuod-tuod nga kahilwayan, demokrasya kag sosyal nga hustisya.
Madamo man sang mag-uyat sang armas agud ipadayon ang makatarunganon nga kawsa sang aton demokratikong rebolusyon sang banwa.
Subongman, katungdanan sang NPA ang hugot nga pagpatuman sa hukom sa rebolusyonaryo nga hukmanan nga nagasabat sa singgitan sang pumuluyong pigos kag hinimuslan nga Negrosanon para sa hustisya.
Samtang, ginasaludohan sang ASJC-NPA ang mga martir nga naghalad sa ila kabuhi para sa kaayuhan sa masang pigos kag ginahimuslan. Ang ila ginbilin nga malahalon nga inagihan mangin matambok nga abuno sa duta sa sur nga bahin sang isla para sa dugang pa nga pagpasulong sa demokratikong rebolusyon sang banwa paagi sa pangmalawigon nga inaway banwa sa bug-os nga isla sang pungsod.
