Balbaliw nga ipabpablaak ti rebolusyonaryo a tignay iti Camarines Norte ti pagiwarnak nga Alipato kas instrumento iti trabaho a propaganda ken panag-organisa dagiti yunit ti New People’s Army (NPA) iti prubinsya. Nagdesisyon ti Komite ti Partido iti prubinsya a balbaliw nga iruar ti rebolusyonaryo a pagiwarnak ti masa idi Hunyo 2024.
Resulta daytoy ti ad-adda a panagpinget ti Komite tapno itampok dagiti lokal nga isyu iti ekonomya ken pulitika, dagiti dangadang ti masa ken ibunannag ti kinaranggas ken pasismo dagiti yunit ti 16th ken 81st IB iti masa a CamNorteño. Kuna ti Komite, kasapulan nga aramaten ti sangaribo ket maysa a pamuspusan ken nasursurok pay, para iti askaw paabante ti gubat ti umili.
Segun iti istap editoryal ti Alipato, dagus da a nangrugi iti proseso ti panagbukel ti dyaryo kalpasan a buklen ti desisyon a balbaliw daytoy nga iwarnak. Nagbayag laeng ti dandani dua a lawas ti panagsurat kadagiti artikulo, panagurnong ti koresponsal ken panangbukel ti dyaryo. Naiyaramid da daytoy iti urnos ti gerilya a tignay iti uneg ti yunit ti NPA a pakaibilangan da.
Addaan ti 10 a paset ti isyu idi Hunyo. Intampok ti Alipato iti editoryal ti panawagan daytoy iti masa a CamNorteño a gibusan ti kinarigat ken tumipon iti gubat ti umili. Addaan daytoy ti damdamag kadagiti aksyon militar dagiti yunit ti NPA-Camarines Norte, dagiti kaso ti panaglabsing iti karbengan-tao ti armado a pwersa ti rehimen Marcos, panagtitinnulong ti masa ken hukbo ken dadduma pay nga isyu ti umili. Naglaon met daytoy kadagiti seksyon ti balakad medikal, tribya ken puzzle.
“Kagiddan ti panangbiag iti Alipato ket ti balbaliw a panangisimpa iti makinarya ken reproduksyon ken distribusyon iti lokal,” istorya dagiti kakadwa kanaig ti sistema ti panangiwaras ti dyaryo. Kunada, kangrunaan a plano da a maikkan ti saggaysa a kopya ti amin a kameng ti Partido iti lokalidad ken sumaruno, uray dagiti kameng dagiti organisasyon ti masa iti tunggal barangay.
Kagiddan ti balbaliw a panangipablaak ti Alipato, ikagkagumaan met ti yunit iti propaganda iti prubinsya a papigsaen ti presensya da iti social media tapno maipasaknap ti artikulo daytoy iti internet. Manipud iti sigud a kapadasan, inbingay dagiti kakadwa a relatibo a nakatulong ti social media iti panangriing iti interes ti masa kadagiti lugar a saan pay a nadandanon dagiti armado a yunit.
Umuna a naipablaak ti Alipato idi 1988 kas resulta dagiti agsasaruno a kampanya nga anti-pyudal. Naipablaak kadagiti panid daytoy ti organisado a panagkaykaysa dagiti mannalon ken hukbo iti sango ti kimmaro a pyudal a panagari dagiti apo’t daga iti prubinsya kakunsabos dagiti lokal nga upisyal ti gubyerno idi dekada 1980.
Kadagiti panid daytoy ket naipadamag ti panagrambak ti masa a CamNorteño iti panangipataw ti pannusa ti NPA kadagiti despotiko nga apo’t daga iti prubinsya. Naipablaak met ditoy ti istorya ti ispontanyo a panaglaban dagiti mannalon ken umili laban iti gangannaet a panagminas idi 1981.
Kadagiti simmaruno a dekada, ti Alipato ket nagbalin a kangrunaan a para-itag-ay kadagiti balligi ti rebolusyonaryo a tignay iti prubinsya a nagserbi nga inspirasyon para iti ad-adda pay a panangpapigsa ti pakinakem ken kapanunotan ti masa a lumaban ken makidangadang. Nagbalin met a kabinnadang ti dyaryo iti tay-ak ti trabaho a propaganda ti regular a panangiwarnak ti Tilamsik ng Dakilang Apoy (Rissik ti Naindaklan nga Apoy), ti rebolusyonaryo a pangkultura a pagiwarnak ti Camarines Norte.
Iti agdama, plano ti yunit nga iruar ti isyu ti Alipato kada kwarto ti tawen. Malaksid ditoy, nakaprograma da met nga agiruar kadagiti espesyal nga isyu nu kasapulan. “Ti Alipato ket silulukat iti tuloy-tuloy a panagpadur-as ken komentaryo. Namnamaen mi… a makatulong daytoy iti [kabuklan a trabaho iti propaganda],” rakurak ti istap daytoy.
Nayon ti Alipato iti adu a rebolusyonaryo a pagiwarnak ti masa manipud iti tukad larangan, prubinsya, rehiyon ken nailyan nga ipabpablaak ti Partido, dagiti yunit ti NPA, ken dagiti alyado nga organisasyon ti National Democratic Front of the Philippines. Dagitoy ket agserserbi a materyal para iti panangpapigsa ti rebolusyonaryo a tignay sadinno man a paset ti pagilyan.
