Kabahin sa usa ka engrandeng kampanya sa disimpormasyon ug saywar ang sunud-sunod nga deklarasyong “insurgency-free” sa milabayng mga semana sa mga upisyal ni Marcos ug sa Armed Forces of the Philippines (AFP). Tumong niining maghimo og mini nga hulagway nga napukan o mapukan na ang armadong pagsukol sa katawhang Pilipino ug wala nay kusog nga manalipud batok sa mga pasista ug mapahimuslanong nagharing hut-ong.
Daku kaayong kabuang ang gipanghinambog sa AFP nga “usa ka huyang nga natarang gerilya” na lamang ang ginalihukan sa Bagong Hukbong Bayan (BHB). Haw-ang ang subli-subli niining gipanghinambog nga sa “eksternal nga hulga” na kini magpukos. Gipanghimakak mismo sa AFP ang kaugalingon niining mga pulong pinaagi sa ginapatuman niining walay-undang nga dinagkung opensiba sa tanang suuk sa nasud. Binilyong piso ang giusik-usikan karon sa AFP sa inadlaw-adlaw nga pagpalupad sa mga helikopter, pagpanghulog og mga bomba, pagpabuto og kanyon, pagpakaon ug pagpasweldo sa liboang mga tropa niini, sa walay pulos nga pagsulay niining puuhon ang mga yunit gerilya sa BHB. Ang plano niining “integrated territorial defense system” nga dinaghang nagarekrut og mga CAFGU padayong nakapokus sa militarisasyon sa mga baryo ug komunidad.
Ginalinlang sa maong mga deklarasyon ang publiko ug ginatabunan ang paghari sa balaod militar ni Marcos sa kabanikanhan. Samtang ginasulti nga “wala nay BHB,” pipila ka liboang tropa pa gihapon niini ang anaa sa kabanikanhan, mga batalyong naka-estasyon sa mga larangang gerilya ug nakapwesto sa liboang detatsment sa mga baryo ug komunidad, nga nagsabwag og kahadlok ug terorismo ngadto sa katawhan.
Taliwala sa mga deklarasyong pangpropaganda niini, nagatunhay ang balaod militar sa mga interyor nga barangay sa Ilocos Norte, Abra, Kalinga, Cagayan, Isabela, Bulacan, Aurora, Laguna, Quezon, Rizal, Oriental Mindoro, Occidental Mindoro, Camarines Norte, Albay, Sorsogon, Masbate, Capiz, Aklan, Iloilo, Negros Occidental, Negros Oriental, Northern Samar, Eastern Samar, Samar, Surigao del Sur, Surigao del Norte, Agusan del Sur, Agusan del Norte, Bukidnon, Davao del Norte, Lanao del Norte, Saranggani, South Cotabato, ug ubang pang prubinsya.
Ang paghari-hari sa militar ug gubat pagpanumpo sa kabanikanhan ni Marcos ug sa AFP nagpakita sa walay hunong nga pagyatak sa mga demokratikong katungod ug paglapas sa mga internasyunal nga makitawhanong balaod. Tataw dinhi ang pag-okupar sa mga pwersang militar ug paghamlet sa liboang barangay sa kabanikanhan, pagmuntar og mga tsekpoynt ug pagpa-logbook, pagbawal sa mga mag-uuma nga magtrabaho sa umahan, pagpahamtang og karpyu, paglimita sa pagpalit og bugas ug pagkaon, pagkontrol sa komersyo ug uban pang lakang nga nagapugong sa lihok sa mga tawo.
Grabe ang kasuko sa katawhan sa mga sundalong naghari-hari ug nagakontrol sa ilang mga baryo. Sagad kini nga mga pasistang sundalo ang tigpasiugda sa paggamit og droga, pornograpiya ug prostitusyon, ug nagsilbing dautang impluwensya sa mga kabatan-onan sa mga komunidad. Pirme ang tibuok adlaw nga inum sa mga sundalo ug paturagas ang pagpabuto og mga pusil kung mahubog. Lambigit ang mga sundalo sa AFP sa nagkadaghang insidente sa pagpangabuso ug pagpanglugos sa mga babaye, bisan pagpanguyab o pagpangabit sa mga adunay asawa.
Pugos ang pagpangrekrut og paramilitar nga CAFGU ug pagpagiya sa mga sibilyan sa mga operasyong kombat. Ginapugos usab sa mga sundalo ang mga tagabaryo ang magsilbing suluguon sa ilang mga detatsment sama sa pagkoral, pagpangahoy, pagsag-ub og tubig pangligo ug uban pa.
Walay hunong ang pagbalay-balay, pagpangharas, “pagpatawag sa kampo” sa mga mag-uuma sa takuban sa “pagpa-clear sa pangalan” o “pagpasurender.” Padayon nga midaghan ang mga kaso sa pagdagit ug ekstra-hudisyal nga pagpamatay, mga masaker, dili makatarunganong pagpangaresto, pagtortyur sa mga sibilyan, ug uban pa. Gibutang ang mga kanyong howitzer duul sa mga panimalay. Ginahulog ang mga bomba duul sa mga komunidad ug umahan nga peligro sa kinabuhi ug nagaguba sa katigayunan ug panginabuhian sa mga sibilyan.
Laraw sa mga deklarasyong “insurgency-free” ug pagpahamtang sa balaod militar nga paluyahon ang katawhan nga mosukol ug panalipdan ang ilang mga katungod ug panginabuhian. Ang pinakatumong sa paghari-hari sa militar sa mga baryo ug komunidad mao ang alagaran ang amo nilang mga agalong yutaan ug mga burgesya-kumprador sa pagpangilog og yuta ug pagpalayas sa mga mag-uuma ug mga nasudnong minorya, ug paghatag dalan sa mga magun-ubong operasyon sa mina, mga plantasyon ug mga proyektong pang-imprastruktura.
Minilyon ang nag-antus sa tanang matang sa pagpangdaugdaug ilalum sa gubat pagpanumpo sa rehimeng Marcos. Dugang pa, nag-antus usab sa grabeng pagpasagad ni Marcos ang minilyong nakaluwas sa mga milabayng kalamidad. Labaw pa silang mag-antus sa sunod nga mga tuig tungod sa mga pagkibhang sa badyet sa panglawas ug edukasyon, ug pagdaku sa badyet sa pasismo (lakip ang dugang badyet alang sa mga sundalo ug NTF-Elcac) ug korapsyon (lakip ang daku kaayong badyet alang sa DPWH ug mga maanomalyang proyektong pang-imprastruktura ni Marcos).
Ang grabeng pagpangdaugdaug, pagpanumpo ug pagpaantus sa masang Pilipino sa rehimeng US-Marcos labaw nga nagpalig-on sa ilang determinasyon nga makigisog aron panalipdan ang ilang mga katungod ug iduso ang ilang gipangandoy nga hustisya, tinuod nga demokrasya ug kagawasan. Sa pagsabwag og terorismo batok sa masang mag-uuma ug mga lumad, ginatudlo ni Marcos kanila nga walay laing pinaka-epektibong pamaagi sa pagsukol kundi ang mogunit og armas ug mosampa sa Bagong Hukbong Bayan.
Atubangan sa nagkagrabeng pagpangdaugdaug ug pagpaantus, determinado ang masang Pilipino kauban ang BHB nga labaw pang pakusgon ang gubat sa katawhan. Determinado silang iasdang ang armadong pagsukol ug maglunsad og mga taktikal nga opensiba, ilabina batok sa pinakagikasilagang tropang pasista nga responsable sa mga ekstra-hudisyal nga pagpamatay, mga masaker ug tanang matang sa terorismo. Sa ingon niining paagi, inubanan sa pagpaasdang sa lapad nga anti-pasista ug antipyudal nga pakigbisog, hingpit nga mapanalipdan ang katawhan ug matubag ang ilang nagkakusog nga panawagan alang sa hustisya ug pagtapos sa balaod militar sa ilang mga lugar.
Dungan sa pagdumdum sa nagkaduul nga anibersaryo sa Partido, atong palig-onon ang determinasyong ipakaylap ang kalayo sa armadong pagsukol aron tupukon ang pasistang paghari ug padilaabon ang malungtarong gubat sa katawhan. Pinaagi sa dili matay-og nga diwa sa pakigbisog ug determinasyong mosukol, siguradong dili mapukan, kundili labaw pang moasdang ang rebolusyonaryong armadong pagsukol.
