Ginatabunan sang report sang UN ang madugo nga rekord sang GRP batuk sa mga bata

Ang Bayan
November 21, 2024

Wala sa kumalingking sa mga krimen sang gobyerno sang Pilipinas kag armado nga pwersa sini ang upisyal nga ginbalhag sang Heneral nga tiglikom sang United Nations sa pinakabag-o nga report tuhoy sa kahimtangan sang mga bata kag armadong konplikto sa Pilipinas. Lubos nga ginatabunan sang report ang tuman ka maduguon nga rekord sang anay rehimen Duterte kag subong rehimen Marcos. Gin-undan pa ini sang pahayag sang “pagkalipay sa padayon nga pagtinguha sang GRP padulong sa proteksyon sang mga bata.”

Suno sa report, may yara ini nalista nga 58 ka malala nga kaso sang paglapas sa kinamatarung-bata kon diin 43 ka bata ang biktima halin Enero 2022 tubtob Disyembre 2023. Sa gamay nga isip nga ini, napulo ka kaso lang ang nalista nga ginhimo sang mga pwersa sang Armed Forces of the Philippines (7 kaso), Philippine National Police (1 kaso) kag National Intelligence Coordinating Agency lakip ang National Task Force-Elcac (2 kaso).

Tuman ka layo sa kamatuoran kag aktwal nga kadamuon sang kaso sang paglapas sang kinamatarung-bata ang mga datos sang UN. Sa listahan sang Ang Bayan, indi magnubo sa 486 ang mga kaso sang paglapas sa kinamatarung-bata sang mga pwersang militar, pulis kag mga ahensya sang gobyerno sang Pilipinas sa pareho nga panahon. Nag-abot sa 112,527 ang isip sang mga bata nga biktima sang mga paglapas nga ini.

Pito sa mga biktima ang ginpatay, apat ang biktima sang pagtilaw nga pagpatay, siyam ang gin-abdak, 35 ang gin-aresto kag ginpriso, kag 33 ang pisikal nga ginsakit. Lakip sa mga ginpatay si Argie Salvador (17) sadtong Pebrero 11, 2023 sa Camarines Norte; ang mag-ulotod nga Fausto (12 kag 15) lakip ang ila iloy kag amay sadtong Hunyo 14, 2023 sa Negros Occidental; kag si Carling Belan (17 anyos) sadtong Hunyo 16, 2023 sa Masbate.

Sanday Salvador kag Belan ginpasibangdan nga mga hangaway sang Bagong Hukbong Bayan (BHB) nga napatay sa engkwentro. Hugot ini nga ginhimutig sang mga kababaryo kag himata. Ang pagpatay sa mag-utod nga Fausto ginpasibangod sa BHB sa pihak sang mapag-on nga ebidensya nga gin-masaker sila sang 94th IB. Samtang, gingamit sang AFP ang gin-abdak sini nga mga anak sang mga Pulang hangaway agud pasungkaon sila.

Linibo man ang biktima sang pagpangbomba, pagpangkanyon kag istraping sang mga pwersa sang AFP sa kaumhan nga natroma sa mga insidente nga ini. Sobra 13,000 ang bata nga gingutom sang militar sa ginpatuman nga blokeyo sa pagkaon sa kasingkion sang operasyon kombat. Wala-tuo man ang mga kaso sang pagkampo sang AFP sa mga eskwelahan nga nakaapekto sa edukasyon sang mga bata.

Sa pauna nga lista sang Ang Bayan subong nga 2024, may yara 417 ka kaso sang paglapas sa kinamatarung-bata ang mga pwersa sang estado kon diin biktima ang 27,278 ka bata.

Pagsunod sang rebolusyonaryong kahublagan

Hugot nga ginasunod sang rebolusyonaryong kahublagan ang mga pagsulundan sang gyera kag internasyunal nga makatawo nga laye. Taliw-as ini sa ginpagwa sa pareho nga report nga 41% nga “nalista” nga mga kaso sang UN ang ginhimo sang BHB. Gin-akusaran sang report ang hukbong bayan sang pagrekrut kag paggamit sang bata nga hangaway, pagpatay ukon paghalit sang bata, reyp kag kalakasan sekswal kag pag-abdak.

“Luyag namon dun-an nga ang National Democratic Front of the Philippines (NDFP) kag ang bug-os nga rebolusyonaryong kahublagan hugot nga nagatib-ong kag naga-protektar sa kinamatarung kag kaayuhan sang mga bata sa tanan nga aspeto sang amon paghimakas,” pahayag ni Ka Coni Ledesma, lider sang NDFP Special Office for the Protection of Children, sa report sang UN.

Suno kay Ledesma, maathag nga nakasulat ini sa Program of Action and Declaration on the Rights and Welfare of Children nga lubos nga nagadumili sa pagrekrut sa mga mas bata sa 18 anyos para mangin Pulang hangaway.”Ang mga prinsipyo nga naplastar diri santo sa, kag masami lapaw pa gani, sa mga talaksan nga gintalana sang internasyunal nga makatawo nga laye,” dugang ni Ledesma.

Nakasulat man ang pagdumili sa pagrekrut sang bata nga hangaway sa patakaran sang Partido Komunista sang Pilipinas halin pa 1988, isa ka tuig antes ang pagtukod sang UN Convention on the Rights of the Child. “Ang mga patakaran nga ini hugot nga ginapatuman sang mga yunit sang BHB sa mga larangan gerilya kag lokal nga organo sang gahum pampulitika sa bug-os nga pungsod,” pagduon ni Ledesma.