Pagkatapos sang 13 ka pagtalakay, ginrekomendar sang Quad Committee sang Kongreso sadtong Disyembre 18 ang pagpasaka sang kaso nga krimen batuk sa pumuluyo sa anay presidente nga si Rodrigo Duterte kag iya mga kahimbon kaangot sa malaparan nga ekstra-hudisyal nga pagpamatay sa idalom sang peke nga gyera kontra-druga sang iya nga administrasyon. Sa kaso nga ini ang kasubong sa ginpasaka sang mga pamilya sang mga biktima sa gyera kontra-druga sa International Criminal Court (ICC). Kadungan sini, ginrekomendar man sang komite nga pasakaan sang hamulag nga kasong kriminal ang mga may kahilabtanan sa Philippine Offshore Gaming Operations ukon POGO.
Suno sa report sang komite, isa sa mga nabuyagyag sa pagtalakay ang sistema sang paghatag premyo ni Duterte nga nagpondo sa “gyera kontra-druga” sang iya nga administrasyon. Suno diri, nagbunga ang sistema nga ini sa culture of impunity nga nagresulta sa ekstrahudisyal nga pagpamatay sang 12,000 tubtob 30,000 ka mga ginadudahan nga nagagamit sang druga. Ang sistema nga ini, suno mismo sa nagtambong sa mga pagtalakay, ang nagsunod sa “modelo nga Davao” sang ekstrahudisyal nga pagpamatay sadtong mayor pa sang Davao si Duterte. Gin-ako mismo ni Duterte, sa isa ka higayon nga nagtambong siya sa pagtalakay, ang paghatag sang premyo sa mga pulis halin sa sobra nga pondo sang mga operasyon kontra-druga.
