Iti panagtugaw manen ni Donald Trump iti imperyalismo a trono kas maika-47 a presidente ti United States ket intugot na ti pangta ken mas dakdakkel a gerra iti naduma-duma a paset ti lubong, kagiddan ti panagsuek ti kabiagan dagiti umili nga Amerikano ken ti pumigpigsa a panangibaw-ing ti pasismo ti reaksyonaryo nga estado ti US.

Idi immuna a nagtugaw ti poder idi 2016- 2020, nagbalin a nalatak ni Trump kadagiti pagannurutan ken addang a ultra-kannawan, rasista, pasista, kontra-demokratiko, kontra-imigrasyon, kontra iti babbai, kontra-LGBT ken ultra-nasyonalista. Nakasubli isuna iti bileg iti napalabas nga eleksyon, kalpasan ti uppat a tawen iti uneg ti Democrat a partido iti nakaro a pannakadismaya ti umili nga Amerikano ti agtultuloy a krisis iti ekonomya ken dumakdakkel ti apoy dagiti gerra nga durdurugan ti US.

Kapada iti napalabas, impangag ni Trump dagiti karit dagiti kadawyan nga umili iti ngumatngato nga presyo, nababa a sweldo, ken kinagamrud ti tubo dagiti dadakkel nga korporasyon. Ngem iti kamaudianan, maibusor iti gura iti “kriminal” nga imigrasyon ken dagiti minorya nga “mangag-agaw ti trabaho,” mangperperdi iti “kaugalian nga Amerikano,” uray dagiti maibusor kadagiti agpalpalama, dagiti agus-usar ti droga, ken dagiti agprotprotesta. Idurduron dagiti opisyal ken alyado ni Trump ti Project 2025, maysa a nasaknap ken napeklan a reaksyonaryo a programa a mangipatungpal ti nasaknap a deportasyon, panangwara iti Department of Education ken naduma-duma nga ahensiya ti gobyerno, panangkissay ti buwis kadagiti korporasyon, panangipaidam ti karbengan ti babbai ken aborsyon ken dadduma pay.

Kalkalluban ni Trump ti ramut ti krisis ti sistema a kapitalista iti US tapno mailemmeng ti pudno nga ibagbagi nga interes dagiti monopolyo kapitalista nga agpenpennek ti insentibo, panangkissay ti buwis ken panangited ti subsidyo nga aggapu ti bulsa dagiti ti umili nga Amerikano. Iti umuna nga termino ni Trump, naglak-am iti supertubo ti dadakkel a korporasyon ti Amerikano iti pinansya, komersyo, langis, panagaramid ti kotse, dagiti armas, agas, dagiti ramit pang-elektroniko ken dadduma pay.

Kasla agdil-dila nga uleg ni Trump ti panagpammarang na a “gayyem ti Russia” ken panangisawang na a “leppasen ti maysa nga aldaw” ti gera iti Ukraine, no kasta ti kinapudno ket isuna mismo ti nangiduron a padakkelen ti ayuda militar idi para iti Ukraine, tapno ipamaysa dagiti misayl ken dadduma pay nga armas ti US iti Russia. Iti babaen ni Trump ket inyetnag na dagiti pagannurutan a panangipit iti ekonomya laban iti Russia. Isuna met laeng ti nangpigis ti katulagan ti US ken Russia para iti pananglimita ti kaadu ken pigsa ti armas nuklear, tapno ikkan ti gundaway ti US nga ibuelo manen ti produksyon dagitoy.

Lastog ti pablaak ni Trump nga kayat na nga “gibusan ti panangranggas” idiay Gaza ken Lebanon, nga iti kinaagpayso na ket naan-anay a supsuportaan na ti Zionista nga Israel ken armado a panangpuntirya ti Iran. Idi 2018 ket imbilin na ken personal nga naipalubos ti panangiyakar ti embahada ti US idiay Jerusalem, siudad nga iruprupir dagiti Palestine a kapitolyo ti pagilian da. Ti plano nga ipatugaw ni Trump nga kalihim ti pangruar nga ugnayan ket am-ammo nga napeklan a Zionista ken kontra iti Iran.

Iti panagsubli ni Trump iti poder, namnaen nga kumaro iti risiris ti nagbaetan ti US iti China. Inkari ni Trump nga tallo beses nga ingato dagiti taripa kadagiti angangkaten a produkto ti Chinese (nga dimmakkel ti nasurok dua a beses manipud 2020) ken naan-anay nga isardeng ti panagangkat kadagiti produkto ti China (no madanun ti 2028). Napigsa a panagibales ni Trump kadagiti pagilian a “bumebentahe” iti linakuan ti US. Agdadata daytoy a pangta iti China, ken mangpangato ti posibilidad ti naan-anay nga armado a komprontasyon iti China ti masanguanan. Maipalagip iti babaen ni Trump immuna nga binukel ti Operation Pacific Eagle-Philippines nga naipamaysa iti panangpapigsa ti presensya dagiti tropa nga Amerikano iti Pilipinas, kagiddan ti pagannurutan a “pivot to Asia” ti US.

Dagiti deklarasyon ni Trump a siguraduen na ti militar a puersa ti US ti “kapipigsaan ken mangpappapatay” ket maiyannurot iti pangiduron ti US nga durugan, paypayan wenno naan-anay a makibiang kadagiti gera iti naduma-duma nga paset ti lubong.

Desperado ti US nga palawaen pay ti sakup ti imperyo daytoy, nga in-inut nga agruprupsa iti tengnga dagiti saan a marisrisut a krisis ti sangalubungan a sistema ti kapitalista. Kalikagum ti US a kontrolen wenno agawen kadagiti karibal na dagiti pagtagilakuan ken pagparpartuatan ti langis, napapateg a mineral ken dadduma pay a rekurso a kasapulan ti produksyon. Naipamaysa ita ti US kadagiti gera iti Eastern Europe ken Middle East, ken agtultuloy a pabaraen ti sitwasyon iti Asia babaen ti panangpadakkel ti presensiya daytoy iti South China Sea ken Pacific Ocean, durugan dagiti alyado daytoy iti NATO ken Japan kadagiti naibaga natural a baybay.

Iti agdama, ti imperyalismo nga US ti kangrunaan a pagtataudan ti pangta ti panagbettak ti mas dakdakkel a gerra iti naduma-duma a paset ti lubong. Kumarkaro ti panangidadanes daytoy kadagiti umili nga agkalkalikagum iti nailian a wayawaya, ken panangipit ken panangsakop kadagiti pagilian nga mangilablaban ti wayawaya ken ti panangdurog daytoy iti gera tapno pagparintumengen dagiti imperyalista a karibal daytoy ken iparegta na ti bukod na a naisangsangayan a superpower iti intero a lubong. Amin a kontradiksyon daytoy ket sigurado nga umirut kadagiti sumaruno a tawen ti pangiduron ni Trump ti hegemonya ti imperyalista nga US.

Rumbeng laeng nga agkaykaysa dagiti umili ti amin a pagilian iti sangalubungan, makipagmaymaysa kadagiti umili nga Amerikano, iti nagkaykaysa a prente laban ti imperyalismo nga US ken dagiti nadagsen a paglintegan daytoy iti ekonomya ken linakuan, ti pannakibiang ken agresyong militar ken ti panangdurog daytoy iti gerra ti naduma-duma a paset ti lubong.

Iti partikular, kasapulan ti militante a panaglaban iti umili a Pilipino iti imperyalismo nga US ken iti panagusar daytoy iti Pilipinas kas dakkel a base militar ken russuatan ti gera.

Kasapulan nga iti amin a kabaelan ket sanguen ti umili ti panangisungsong daytoy ti armado nga pannakirupakna iti South China Sea ken iti panangguyod iti pannakisinnupiat daytoy iti China. Kasapulan a sipupudno nga ipalgak ken batikusen ti papet a rehimeng Marcos iti panagrukbab na iti imperialismo nga US.

Ad-adda a nasken ita ti nasaknap a panagkaykaysa ti umili a Pilipino ti aniaman a tiempo iti pakasaritaan, ken ti panangpadas iti amin a benneg ti pannakidangadang tapno magun-od ti nailian ken sosyal a wayawaya.