Mibarog ang mga lumulupyo sa Barangay Sulitan, Catubig, Northern Samar nga usa ka sibilyan si Jerick Jugal, usa sa mga giingong napatay sa 20th IB sa serye sa armadong engkwentro batok sa Bagong Hukbong Bayan (BHB) sa Catubig niadtong Nobyembre 5.
Nanawagan sila og imbestigasyon ug hustisya sa pagpatay sa biktima. Sumala sa silingan ni Jugal, usa siya ka responsableng anak nga maoy bugtong nanginabuhi para sa ilang pamilya.
Pagkahuman sa giingong mga engkwentro, nagreklamo usab ang mga lumulupyo sa Barangay Sulitan ug mga kasikbit nga komunidad tungod sa gipahamtang nga mga restriksyon sa mga sundalo. Wala sila gitugutan nga moadto sa mga uma aron magtrabaho ug gibawal bisan ang pagdala og pagkaon sa komunidad.
Samtang, nataho sa Guihulngan City, Negros Oriental ang serye sa mga paglapas sa tawhanong katungod sa 62nd IB.
Niadtong Nobyembre 5, gisulod sa 16 ka sundalo ang balay ni Loring Geronimo sa Sityo Ponong, Barangay Trinidad. Gipangita sa mga sundalo ang iyang asawa ug anak, ug gitiunan siya ug ang iyang apo og mga tag-as nga armas ug gipailalum ang tibuok pamilya sa bangis nga interogasyon. Sa maong adlaw usab, iligal ug walay pananghid nga gisulod sa mga sundalo ang balay ni Helen Bardok sa Barangay Binobohan samtang siya anaa sa trabaho.
Niadtong Nobyembre 8, gikulata sa mga sundalo sa 62nd IB ang 38-anyos nga mag-uuma nga si Boyet Ospar sa Sityo Manlibod, Barangay Trinidad. Nataho usab niining milabayng mga semana ang iligal nga okupasyon ug pagkampo sa mga sundalo sa mga eskwelahan sa mga barangay sa Guihulngan City, Vallehermoso ug Canlaon City. Ang pagkampo sa mga sibilyang pasilidad usa ka seryosong paglapas sa internasyunal na makitawhanong balaod.
Pagpangilog og yuta. Gipig-ot ug gisulayan pagpalayas pag-usab sa mga pwersa sa estado ug pribadong gwardya ang mga lumulupyo ug mag-uuma sa Barangay Viga, Angadanan, Isabela. Ginailog sa pamilyang Gamboa ang 23.6 ektaryang yuta nga 50 ka tuig nang ginaugmad ug gipuy-an sa mga mag-uumang myembro sa Panagkaykaysa ti Mannalon a Maag-agawan ti Daga (Pumalag). Giadtoan sila sa hepe sa pulis ug administrador sa lungsod sa Angadanan niadtong Oktubre 30 aron pugson silang makig-areglo sa mga Gamboa. Gitanyagan sila og kwarta aron molayas sa lugar.
Subling mibalik ang hepe ug duha ka pulis niadtong Nobyembre 2 aron pakumpiskahon ug pasunugon sa mga pribadong gwardya ang mga plakard ug istrimer sa mga mag-uuma. Sa dihang nagkasinikhanay ang mga lumulupyo ug pulis, mihulbot ug nagpabuto og pusil ang hepe sa pulis. Tulo ka mag-uuma ang giaresto. Gihulga sila sa mga gwardya nga pagadauton ang pananum sa mga mag-uuma.
