Ginsug-alaw sang mga mamumugon ang liwat pagbukas sang kongreso sang protesta sadtong Nobyembre 4 agud igiit ang pagpasar bilang laye sang dugang-sweldo sa pungsodnon nga lebel. Suno sa ila, wala nagaupod ang sensilyo nga ginahatag sang mga regional wage board sa pagtimbuok sang implasyon kag pagbulusok sang pangabuhi sang mga mamumugon. Pinakaulihi sini ang mumho nga ₱40 nga dugang-sweldo sa mga mamumugon sa Western Visayas nga siling nila nga indi gani makabakal sang isa ka kilo nga bugas.
Kadungan sa padayon nga pag-usdang sang ila pangabuhi, naga-atubang man ang mga mamumugon sang iligal kag arbitraryo nga kakasanay kag iban pa nga paglapas sa mga kinamatarung sa pangabudlay.
Isa diri ang asod-asod nga kakasanay kag pagkapatay sang mga mamumugon sa Herma Shipyard sa Mariveles, Bataan sa nagligad nga bulan. Indi magnubo sa 50 ka mamumugon ang ginkakas sadtong Agosto lakip ang mga nagatrabaho sa hilimuan sa duha tubtob 25 ka tuig. Sadtong Septyembre, duha ka mamumugon ang napatay samtang yara sa trabaho tungod sa indi luwas nga mga kundisyon sa trabahuan.
Sa ABS-CBN, higante nga network sa telebisyon, mas o menos 100 ka mamumugon ang yara sa peligro nga madulaan sang trabaho tungod sa pagnubo kuno sang kita halin sa mga pasayod sang network. Ginapanag-iyahan ang kumpaniya sang pamilya Lopez, isa sa pinakadako nga burgesya kumprador sa pungsod.
Sa Davao del Sur, 3,200 ang kalit kag arbitraryo nga ginkakas sang Franklin Baker Inc. sadtong Oktobre 3. Ginpaabot sang kumpaniya ang pagkakas paagi lang sa mensahe sa isa ka Facebook group. Tubtob subong, indi maathag sa mga mamumugon ang ila istatus.
Sa Quezon City, nagkasa sang welga ang mga drayber kag konduktor sang Mark Eve’s Transit sa atubang sang pradahan sini sa P. Tuazon Boulevard, Barangay Project 4 sadtong Nobyembre 5. Ini para pamatukan ang pagkakas sa lima ka upisyal sang ila unyon. Ginkakas ang amo nga mga mamumugon pagkatapos nga nagpamalibad ang unyon sa padihot sang maneydsment nga ini ang magtalana sang mga upisyal sang ila unyon.
Dugang ang mga mamumugon nga ini sa ginkakas nga 800 ka empleyado sang Ninoy Aquino International Airport kag sobra 300 ka mamumugon sa Mactan Export Processing Zone sadtong Septyembre.
Samtang, gintanyagan lang sang ₱10,000 nga separation pay ang ginkakas nga mga mamumugon sang AC Mojares Construction bisan apat tubtob 19 ka tuig na sila nga nagatrabaho sa kumpaniya. Dako man ang wala nabayaran nga sweldo sa ila para sa overtime pay, holiday pay, rest day pay, kag night shift differential. Nagprotesta ang mga ginkakas nga mamumugon sa atubang sang kumpaniya sa Quezon City sadtong Oktobre 29, agud igiit ang paghatag sang nagakadapat sa ila.
