Ginransak sang mga berdugong 94th IB ang balay ni Milan Bolhano, isa ka mangunguma nga residente sang Sityo Manluki, Barangay Carabalan, Himamaylan City, Negros Occidental sadtong Oktubre 7, alas-6:00 sang gab-i.

Ginpasibangdan ang pamilyang Bolhano nga ginhimo nga imbakan sang mga armas-luthang sang Pulang hangaway ang ila balay. Wala respeto nga gin-utingkay sa mga tropa militar ang ila balay lakip na ang ginbutangan sang ila mga produkto nga mais. Pagkatapos sini, ginkawat man sang mga soldado ang smartphone sa bata sang biktima.

Nagtuga ini sang kahadlok sa pamilya ilabina sang ila mga menor de edad nga mga bata nga nakasaksi sa amo nga kalakasan sang 94th IB. Napamatud-an nga wala sang basehan ang ila akusasyon sang wala man sila makita sa balay sang biktima.

Hugot nga ginkundenar sang Romeo Nanta Command-New People’s Army (RNC-NPA) ang lapnagon nga pagterorisa sang 94th IB sa mga komunidad sa South Central Negros. Gani, mas mag-triple pa ang pagpaninguha sang mga Pulang hangaway nga mahatagan sang hustisya ang tanan nga biktima sang reaksyonaryong estado.