Balligi a nairupir dagiti mangmangged ken dadduma a demokratiko a sektor ti karbengan da a makapagrali iti sakaanan ti Mendiola idiay syudad ti Manila idi Nobyembre 30 kagiddan ti pananglagip iti Aldaw ni Bonifacio.

Saan a nagpagungon dagiti nagrali uray mano a daras isuda a rinanget dagiti pulis tapno lapdan ken dupraken ti martsa da. Nasurok 40 a dimmar-ay iti rali, kaadwan ket agtutubo, ti nasugatan iti panagranggas dagiti pulis. Inarestar met dagiti pulis ni Nilo Mortifero, maysa a senior citizen ken organisador ti Bayan Muna a kagapgapu laeng iti stroke.

Indeklara dagiti mangmangged daytoy nga aldaw ti panagsingir ti masa nga anakling-et iti rehimen Marcos Jr. Awit da ti panawagan para iti makabiag a sweldo, regular ken disente a trabaho ken nalaka a taraon ken serbisyo. Kadekket dagitoy a panawagan ti panangpasungbat kadagiti abusado ken agtatakaw ti pondo ti umili.

Kagiddan ti tignay idiay Mendiola, naangay met ti taripnong dagiti mangmangged ti Far East Alcohol Corporation idiay Apalit, Pampanga; Umicore idiay Subic, Zambales ken Nexperia Philippines idiay Laguna. Kadwa da ti dadduma a sektor, insayangkat dagiti balangay ti KMU dagiti protesta kadagiti syudad ti Baguio, Calamba, Cebu ken Davao.