Iti maysa a kubo ti maysa a larangan iti Southern Tagalog, nakaummong ti sumagmamano kadagiti instruktor ken ti dadaulo nga instruktor iti Pagadalan a Jose Maria Sison (PJMS). Marikna da ti gagar a rugyanen ti panagadal. Tallo a klasrum ti aglukat iti didiay a rabii: Dagiti estudyante ket magudwa iti Basaran a Proletaryo a Takder ken Pannirigan iti Rebolusyon, Ekonomya a Pangpulitika ken Imperyalismo.

Iti uneg ti sumurok-kumurang dua a bulan, nagbalin a kadawyan a pasamak daytoy iti tunggal base ti maysa a yunit ti New People’s Army (NPA) idiay Southern Tagalog. Linuktan ti yunit ti PJMS tapno pormal a rugyan ti Basaran a Kurso ti Partido (BKP) para kadagiti kameng ti Partido ken masa nga aktibista manipud kadagiti makonkonsolida a baryo.

Naisayangkat a paset-paset ti BKP kas panagannatop iti iskedyul ti masa a makumikom iti panaguma, panagsapul wenno panangaywan kadagiti annak da. Nu agbayag ti oras sakbay a marugyan ti innadal, uman-annatop ti yunit iti panangisyangkat ti pulong talakayan wenno pulong kultura.

Nu dadduma bayat nga adda maysa agingga tallo a klasrum iti maysa a pwesto, adda pay maysa a tim a naka-detats tapno mangted ti panagadal iti lugar nga as-asideg iti pagtaengan ti masa. Positibo a natudo iti yunit ti saan a panaguray wenno panagtarigagay ti ideyal a sitwasyon tapno isayangkat ti innadal. Bayat nga adda dagiti bugso ti panagadal nga addaan aggigiddan a klasrum ken adu a bilang ti estudyante, adda met kagiddan na a saggaysa wenno sumagmamano tapno mapaturpos ti masa iti innadal.

Dagiti estudyante ket aglalaok a natataengan, agtutubo, lallaki ken babbai, ken nu dadduma ket kadwa da pay dagiti annak da. Kasta met nga adda dagiti beterano ken agdadamo kadagiti instruktor, ngem nasurok kagudwa ket manipud kadagiti baro a sampa a kabataan. Naggigiddan ti laing dagiti instruktor a nagtaud iti dasig a mannalon ken petiburgesya.

Insayangkat ti yunit ti BKP gapu ta nalawag a kasapulan a maarmasan ti masa kadagiti rebolusyonaryo a teorya ken prinsipyo tapno masango ken malabanan ti kumarkaro a krisis ken terorismo ti estado kadagiti komunidad da. Panangikagumaan met daytoy a sumungbat iti tignay panagilinteg segun iti yunit.

Sakbay ti innadal, nagisayangkat ti yunit ti dua a bugso ti BKP Instructor’s Training. Naikagumaan iti pagsasanay nga iyannatop ti BKP iti partikular a kasasaad, kapadasan ken kultura ti masa. Napateg a dagiti instruktor ket addaan naan-anay a panagsukisok iti gimong ken panagamiris iti dasig iti lokalidad. Naalukoy met dagiti instruktor nga agbalin a manaparnuay iti wagas ti panagisuro ken nasayaat a panagtipon dagiti pyesa ti rebolusyonaryo nga arte kadagiti topiko.

Binadangan ti masa ken milisyang bayan ti panagsagana ti Hukbo. Timmulong da iti panagawis kadagiti estudyante, panagisigurado ti seguridad ken panagserrek ti kasapulan a suplay. Malaksid pay ditoy ti sakripisyo ti masa iti panagdar-ay iti panagadal a nu dadduma ket agbaybayag agingga alas-11 ti rabii uray nu adda trabaho da kabigatanna. Nu marabiiyan da, agsasango nga agkakape ti masa ken dagiti Nalabbaga a mannakigubat tapno makariing dagiti agad-adal ken instruktor.

Iti panagleppas dagiti innadal, sangsangkamaysa nga agkakanta dagiti instruktor ken agad-adal ti nadumaduma a rebolusyonaryo a kankanta. Sakbay nga agawid da, naragsak nga agaalamano ken agpipinnakada ti masa ken Hukbo kagiddan dagiti awis ken sungbat iti sumaruno a panagadal. Nagbunga dagiti innadal iti panagitakder ti maysa a baro a sangay ti Partido iti lokalidad.

Dagus a nasubok ti kinatibker ti masa a nagturpos iti BKP idi simmango da iti pasista nga atake ti kabusor dagiti baryo da ken sakupen ti focused military operation ti AFP. Pinaay ti panagkaykaysa da ti terorismo ti estado. Sangsangkamaysa da a limmaban, a nairut a kabinnadang ti pudno a hukbo da.

Inpamatmat ti aktibo a panangitandudo ken panagdar-ay ti masa iti Pagadalan a JMS nga aw-awatenda ti panagilinteg ti Partido ken ti paset d ditoy. Rumbeng nga agserbi a karit kadagiti rebolusyonaryo—nangruna kadagiti kadre ken kameng ti Partido ken Hukbo—nga ipasagepsep kadagiti lokal a pwersa ti panagilinteg kas rebbengen da met tapno sisasagana da nga idaton ti pigsa, laing ken kabaelan iti balbaliw a panagpapigsa ti demokratiko a rebolusyon ti umili.