Madinalag-on nga nagiit sang mga mamumugon kag iban pa nga demokratiko nga sektor ang ila kinamatarung nga makarali sa tiilan sang Mendiola sa syudad sang Manila sadtong Nobyembre 30 angot sa paghanduraw sa Adlaw ni Bonifacio.
Wala nagpatandog ang mga nagrali bisan pila ka beses na sila nga gin-atake sang mga pulis agud punggan kag bungkagon ang ila martsa. Sobra 40 nga nagtambong sa rali, kadam-an mga pamatan-on, ang napilasan sa kalakasan sang mga pulis. Gin-aresto man sang mga pulis si Nilo Mortifero, isa ka senior citizen kag organisador sang Bayan Muna nga bag-o lang naumpawan sa stroke.
Gindeklarar sang mga mamumugon ang adlaw nga ini bilang adlaw sang pagsukot sang masang anakbalhas sa rehimen Marcos Jr. Dala nila ang panawagan para sa makabuhi nga sweldo, regular kag desente nga trabaho, kag barato nga pagkaon kag serbisyo. Kaupod ang mga panawagan nga ini sa pagpasabat sa mga abosado kag kawatan nga nagakawkaw sa pondo sang pumuluyo.
Kadungan sang hublag sa Mendiola, may yara man sang mga pagtipon ang mga mamumugon sang Far East Alcohol Corporation sa Apalit, Pampanga; Umicore sa Subic, Zambales kag Nexperia Philippines sa Laguna. Kaupod ang iban nga sektor, ginlunsar sang mga tsapter sang KMU ang mga protesta sa mga syudad sang Baguio, Calamba, Cebu kag Davao.
