Aton pasidunggan an mabayanihon nga Pula nga mangaraway san Bagong Hukbong Bayan-Rodante Urtal Command (BHB-RUC) nga nagkapot san armas ngan naghalad san ira kinabuhi para sa pagtatalwas san katawhan Pilipino. Kaupod sini an pito nga mangaraway nga namartir sa Barangay Santander, Bobon sadton Abril 30, 2023, ngan tulo nga mangaraway nga namartir liwat sa Barangay Mabini, Catarman sadton Mayo 28, 2023.
Sugadpaman, bisan san-o diri masusumo an BHB ngan masa nga pasidunggan sira komo mga martir san rebolusyon ngan mag-upay nga anak san katawhan. Sa paghiningyap nira nga talwason an katawhan sa panraugdaug, nagin biktima sira san mga grabe nga panalapas sa internasyunal nga makatawo nga balaud ngan brutal nga gerra nga panmuypoy san rehimen Marcos.
An pito nga Pula nga mangaraway sa Bobon namatay sa terorista nga panmomba tikang sa kahanginan san 8[th] Infantry Division, 803[rd] Infantry Brigade, ngan 43[rd] Infantry Battalion sa usa nga temporaryo nga kampo san usa kaiskwad san BHB dapit alas-2 san kaagahon. Diri ungod nga napapalibutan an ira kampo san mga command-detonated explosives. Ngani, usa kasemana pa la sira sa erya ngan pira sa ira masakit pa sanglit waray sira kapas nga umato. Labot sa panmomba nagbuhi liwat an pasista nga militar san 10 kabala san 105mm howitzer. Klaro nga sobra-sobra nga kusog an gin-gamit agud perdihon an yunit.
Namartir sini an mga mangaraway nga sira:
Buloy Arandia (Ka Aga), 26, tikang sa Barangay Libertad, Matuguinao, Western Samar,
Movie dela Cruz (Ka Leon), 19, tikang Barangay Carolina, Matuguinao
“Ka Real” Jarito, Catarman
“Ka Danaya” Bartulo, 19, tikang Barangay Cagbigajo, Pambujan, Northern Samar
Jeffrey Pahot Obiado (Ka Tulpak), 19, tikang Barangay Caputoan, Las Navas, Northern Samar
Dagre Pajares (Ka Dove), 26, tikang Barangay San Francisco, Las Navas, ngan si
“Ka Kapitan” Bantilo, tikang Barangay Cababtoan, Pambujan.
Labot sa pito nga napatay, pito nga mangaraway liwat an nasamaran sa terorista nga panmomba san kaaway. Usa sa ira, si “Kurati,” an gindakop. Imbes nga kilal-on an katungod komo hors de combat gin-gamit siya agud lanaton an iba nga mga kasama ngan masa.
Sa dayuday nakaatras an mga samaran nga Pula nga mangaraway ngan nakaabot sa Mabini, Catarman. Waray hunong sira nga ginlanat san dako nga operasyon pankombat diin gin-gamit an mga ayam nga K-9 ngan ginsingabot gud an mga binaydan nga aset. San atakihon nira an base, naigo san punglo sira Geraldine Basiloy (Ka Give) ngan Abigail Baselga (Ka Moana). Ginbuligan ngan waray pabay-i ni Joshua Sagdullas (Ka Miyong) si Ka Moana kundi nadakop siya san mga pasista, gin-gapos, ginpakurian ngan ginpanbuno tubtub mamatay.
Hinigugma sira san mga kasama. Sobra pa sa kag-anak o bugto an pagtagad nira sa kada tagsa; mga kaupod sa mga sakripisyo ngan kakurian, kabakyang sa pag-atubang sa mga problema, guti man o dako, tungod kay ginbubutok sira san nag-uusahan nga dakila nga kawsa. Pinakahitaas nga Pula nga saludo an naaangay sa ira, sira nga waray pagruhaduha nga naghalad san kinabuhi agud magserbe sa katawhan.
Nangangalas gud an bug-os nga kaapihan san BHB ngan an masa nga tinalumpigos sa mapait nga gin-agian san mga kasama tungod sa maraut nga gerra san pasista nga estado. Naglalarab an aton karuyagon nga kab-uton an hustisya sa ira ngaran. Kadungan sini, sa ira nga mga bayani san rebolusyon kita padayon nga nakuha san susbaran ngan inspirasyon sa pag-atubang sa presente nga mga ayat san kinabuhi-ngan-kamatayon nga pakigbisog.
Adlaw-adlaw, sa ngatanan naton nga buruhaton, pirme naton handumon an hinigugma naton nga mga martir. Hinumdumon naton an maglipayon, masurub-on, ngan puno han leksyon nga mga panahon nga nakaupod naton sira. Magsaad kita nga igpapadayon an dakila nira nga ungara nga pagserbihan an masa nga tinalumpigos, kalugaringon nga kinabuhi man an ighalad, tubtub sa madara ini nga pakigbisog sa diri pa naaabot nga lebel ngan hul-os nga kadaugan.
Hustisya para sa Bobon 7 ngan Catarman 3! Hustisya para sa ngatanan nga biktima san pasismo san estado!
Pasidunggan an mga rebolusyunaryo nga bayani san katawhan! Igpadayon an ira pakigbisog para sa nasyunal nga katalwasan ngan demokrasya!
