Katulad ng aserong kumukulo ang bumubulwak ngayong galit ng masang magsasaka at buong sambayanang Pilipino laban sa burukrata kapitalismo. Itinutulak nito ang mamamayan na kumilos at magprotesta, para ipahayag ang kanilang disgusto sa rehimeng US-Marcos Jr sa gitna ng patuloy na nalalantad na mga kaso ng malawakang korapsyon at katiwalian. Ngayong buwan ng mga magsasaka, nasasaksihan natin kung paano naglunsad at lumahok ang uring magsasaka sa mga pagkilos na ito bilang salaminan ng kanilang nagngangalit na poot, tangan ang panawagang pagpapabagsak sa burukrata kapitalismo kasama ang imperyalismo at pyudalismo, na mga pundamental na suliranin sa lipunang Pilipino.
Kasaysayan na mismo ang nagpatotoo na hindi winakasan ng pagpapalit lamang ng mga taong nakaupo at nagpapatakbo sa reaksyunaryong estado ang matinding kahirapan at kagutuman ng sambayanan. Ang kailangan ay baguhin ang bulok na naghaharing sistemang malakolonyal at malapyudal ng Pilipinas. Walang ibang makakalagot sa lumang tanikala ng imperyalismo, pyudalismo at burukrata kapitalismo, ang tatlong salot sa lipunang Pilipino, kundi ang punglong pinaputok ng digmang bayan.
Nagpupuyos sa galit ang masang magsasaka dahil sa harap ng matinding kahirapang dinaranas nila, walang kahihiyan ang mga burukrata kapitalista, na konsentrado sa anyo ng kasalukuyang rehimeng US-Marcos, sa pangungurakot at pandarambong sa kaban ng bayan. Inilalaan ng mga burukrata kapitalista ang pampublikong pondo sa maanomalyang flood control projects na trilyun-trilyon na ngayon ang nailalantad na halagang nasasangkot; at sa labis na pinresyuhang konstruksyon ng farm to market roads na umaabot sa ₱10 bilyon ang nasasangkot na halaga. Sa rehiyong TK, may 100 lokal na pinondohang farm to market roads na nagkakahalaga ng kabuuang ₱1.4 bilyon sa CALABARZON; at ₱539 milyon naman sa 34 farm to market road projects sa MIMAROPA noong 2024. Baliw na baliw ang mga burukrata kapitalista sa pag-iisip, pagpupuslit at pagsasalamangka ng mga panukalang proyektong pang-imprastraktura at pangkaunlaran para kumita nang malaki sa halip na ayudahan ang mga magsasakang apektado, lugi o bagsak ngayon ang produksyon ng palay dahil sa sunud-sunod na pinsala ng mga kalamidad. Naiulat ng Department of Agriculture ang ₱565 milyon na panimulang pagkalugi sa agrikultura mula sa bagyong Mirasol hanggang Nando na nakaaapekto sa 17,061 na magsasaka at 16,120 ektarya ng bukirin.
Ang burukratang kapitalista ang gumagawa at nagpapatupad ng mga batas na pabor sa mga naghaharing uring panginoong maylupa at malalaking komprador at kontra sa mamamayan. Patuloy na ipinatutupad ng mga burukrata kapitalista ang neoliberal na patakaran sa agrikultura at unti-unting pagpatay sa lokal na produksyon ng mga magsasaka alinsunod sa dikta ng imperyalismong US. Tampok na halimbawa nito ang Rice Liberalization Law na pamatay na saksak sa mga magsasaka sa ibayong pagpapabaha sa pamilihan ng imported na bigas na naghatak pababa sa lokal na presyo ng palay.
Sa pagpasok pa lang ng buwan, hinambalos na ang mga magsasaka ng napakababang presyo ng palay sa farmgate kung saan naitala ang ₱8 kada kilo sa Mindoro, ₱9 kada kilo sa Laguna at ₱10 sa Quezon, at sa Batangas, sumadsad pa ito sa ₱5. Pinakamataas na sa rehiyon ang ₱12 kada kilo sa Palawan, na kung tutuusi’y napakalayo pa sa hinihiling ng mga grupo ng mga magsasaka na ₱20 kada kilo bilang patas at nakabubuhay na presyo nito.
Napakalimitado naman ng nabebenepisyuhan ng ipinangangalandakan ng rehimen na ₱20 kada kilong bigas na ibinebenta lamang sa mga Kadiwa store na iilan lang din naman ang meron sa rehiyong TK. Liban sa bigas, binabaha rin ang lokal na pamilihan ng imported na asukal, sibuyas, karne ng manok, baboy at isda.
Iniinda pa rin ng mga magtutubo sa Batangas ang pagsasara ng CADPI na pumatay sa kabuhayan ng mga magsasaka roon. Planong tayuan ng solar farm ang lugar kung nasaan ang CADPI. Bumagsak din ang produksyon ng niyog sa bansa nang 20% sa unang bahagi ng taon dahil sa epekto ng mga kalamidad na El Nino at malalakas na bagyo. Ang langis ng niyog ang pinakamalaking ineeksport ng bansa sa pandaigdigang merkado.
Ang burukrata kapitalismo ang sistemang nagtatanggol at nagpapanatili ng kalagayang walang sariling lupa ang nakararaming magsasaka at dumarami pa ang naaagawan ng lupa. Walang habas na isinasagawa ang pangangamkam ng lupa sa pamamagitan ng pagpapalit-gamit ng lupa.
Sa Laguna, ikinumbert ang mga lupang pang-agrikultura sa Calamba at Cabuyao tungong mga industriyal at komersyal na gamit sa kabila ng pagiging premyadong sakahan ng mga ito. Sa Rizal at Cavite, hinaharap pa rin ng mga mangingisda at magsasaka ang dislokasyong dulot ng Manila Bay Reclamation Projects at Manila Rail Transit, na nakaapekto sa mga komunidad sa baybay-dagat sa Bacoor, Noveleta at Taytay.
Ipinagkakait sa mga mangingisda kahit ang mga lugar pangisdaan. Apektado ang lahat ng mga mangingisda matapos pahintulutan ng Korte Suprema na pumasok ang malalaking komersyal na barkong pangisda sa munisipal na pangisdaan at sa gayo’y aagawan ng mahuhuli ang maliliit na mangingisda. Sa Cavite, dinemolis ang mga talabahan na itinayo nila at pinagmumulan ng kanilang kita matapos wasakin ang mga ito nang walang konsultasyon o kompensasyon para bigyang daan ang 650-ektaryang proyektong reklamasyon.
Dagdag pa, kinakamkam din ang lupaing ninuno ng mga pambansang minorya para tayuan ng pook ekoturismo, resort, dam, mina, quarry, base militar at iba pa sa interes ng malalaking burgesya kumprador, panginoong maylupa, burukrata kapitalista at imperyalismong US. Kabilang dito ang Tamaraw Reservation Expansion Project (TREP) na nagpapalayas sa mga katutubong Mangyan sa Mindoro, Kaliwa-Kanan Dam na magdudulot ng dislokasyon sa mga Dumagat at Remontado ng Rizal-North Quezon at Balabac Island Resort na nagpapalayas sa mga katutubong Molbog at Palaw’an sa Palawan.
Malaking kabalintunaang ang mga magsasaka ang pinakanagugutom sa bansa gayong sila ang lumilikha ng pagkain ng bayan. Dahil dito, namumulat ang uring magsasaka at natututong lumaban para sa kanilang buhay, karapatan at kabuhayan. Gayunman, pasismo at pagsupil ang tugon sa kanila ng rehimeng US-Marcos Jr. Kahit ang mga kontrata sa “kontra-insurhensya” at depensa ay hinuhuthutan ng mga burukrata kapitalista. Nilalaanan ng malaking pondo ng rehimen ang pagpapaigting ng militarisasyon sa kanayunan, pambobomba at panraratrat sa mga kabundukan. Ang epekto nito’y takot sa mga residente at ibayong paglabag sa kanilang karapatang-tao. Kinakasangkapan ng mga burukrata kapitalista ang Anti-Terror Law para busalan ang bibig ng mga lider-magsasaka sa rehiyon. Hindi natin kailanman malilimutan at tuluy-tuloy na papapanagutin ang mga bayaran at berdugong AFP-PNP na tigmak ng dugo ang kamay sa Bloody Sunday massacre na kumitil sa buhay ng mga lider-magsasaka at aktibista sa rehiyon.
Hindi kailanman papanig ang mga burukrata kapitalista sa interes ng masang magsasaka. Kasabwat nila ang iba pang naghaharing-uring malaking burgesya kumprador at panginoong maylupa para apihin at pagsamantalahan ang uring magsasaka. Wala tayong aasahang pagpapatupad nila ng tunay na reporma sa lupa at pambansang industriyalisasyon. Nagsasanib-pwersa ang mga naghaharing uring ito sa paglaban sa pagpapaunlad ng isang nakatatayo-sa-sarili at progresibong pambansang ekonomya.
Dapat magkaisa ang masang magsasaka para sa tunay na reporma sa lupa at labanan ang pang-aagaw at pagpapalit-gamit ng lupa. Dapat ding isulong ng mga magsasaka at magbubukid ang pagpapababa ng upa sa lupa, pagpapataas ng sahod ng manggagawang bukid, pagpawi sa usura at pagpapataas ng farmgate price ng kanilang mga produkto.
Sa panahon ngayon na ang buong rebolusyonaryong kilusan ay naglulunsad ng kilusang pagwawasto, higit dapat na isulong ang digmang bayan na sa esensya ay digmang magsasaka. Nilalahukan ito ng uring magsasaka bilang pangunahing pwersa ng demokratikong rebolusyong bayan. Nananawagan ang PKM-TK sa lahat ng uring magsasaka na 18 anyos pataas, nasa maayos na pangangatawan at pag-iisip, at handang yakapin ang masalimuot na buhay gerilya: sumapi sa Bagong Hukbong Bayan at walang pag-iimbot na ialay ang buhay para paglingkuran ang sambayanan. Ang BHB ay hukbong magsasaka na naglulunsad ng taktikal na opensiba, nagsusulong ng anti-pyudal na pakikibaka at rebolusyong agraryo, at nagtatayo ng base sa kanayunan. Sa mga lugar sa kanayunan kung saan epektibo nating nagagawa ang tatlong sangkap ng digmang bayan, doon pinakamalakas ang ating Pulang kapangyarihang pampulitika at naitatayo ang mga binhi ng demokratikong gubyernong bayan, na pantapat at laban sa reaksyunaryong burukrata kapitalismo. Ang naitatayong baseng magsasaka ay nagsisilbing muog at di-masasaid na bukal ng suporta at kadluan ng Pulang mandirigma para sa BHB. Mahigpit itong katuwang ng mga organisasyong masa, partikular ang PKM at iba pang sumusuporta sa digmang bayan sa kanayunan para papanghinain hanggang tuluyang maibagsak ang imperyalismo, pyudalismo at burukrata kapitalismo na ugat ng kahirapan sa ating bansa.###
