Ipinagdiriwang ngayong buwan ng Oktubre ang kadakilaan ng mga magbubukid sa Pilipinas. Bagaman isa sa mga pangunahing lumilikha ng yaman ng bansa, ang mga magsasaka ang isa sa nakararanas ng pinakamatitinding paghihirap at pagsasamantala. Sa isang lipunang malakolonyal at malapyudal, hawak sa leeg ng mga imperyalista, malalaking burgesyang kumprador, burukrata kapitalista, at mga panginoong maylupa ang mga magsasaka. Talamak ang pang-aagaw ng lupa at pambabarat sa kanilang mga produkto kaya lubog sila sa walang tigil na pangungutang. Ang mga produktibong lupa ng magsasaka ay kinukumbert bilang mga lupang pagkakakitaan ng naghaharing uri at mga imperyalistang korporasyon—bilang mga minahan, plantasyon para sa eksport, lokasyon ng ecotourism, mga subdivision, at iba pang proyektong mapandambong sa kalikasan para sa kanilang ganansya at interes.
Salot sa lupa ng magsasaka ang rehimeng US-Marcos Jr! Salot sa lupa ng Lambak Cagayan!
Sa Lambak Cagayan, palay at mais ang pangunahing tanim ng mga magsasaka ngunit ang mga malalawak na pananim nila ay hindi napapakinabangan ng mamamayan dahil sa mga garapal na usero-komersyante na nambabarat at nagpapahirap sa kanila. Ang mga manggagawang-bukid na nagtatrabaho sa mga tubuhan ay malaki rin ang pasakit galing sa mga kumpanya ng sugar mill. Kabalikat ng usurero at mga kumpanya, sinasakal ng imperyalista ang mga magsasaka sa pagitan ng malawakang pagtatanim ng cash crop—mekanismo upang tugunan ang pangangailangan ng mga imperyalistang bansa para sa murang hilaw na materyales. Sa patuloy na panghihimasok ng mga ito sa lupa ng mga masang magsasaka, umiigting ang kahirapan sa kabuhayan. Tumataas ang presyo ng farm inputs habang nananatiling mababa ang presyo ng ani ng magsasaka na ang mga usurero-komersyante mismo ang nagtatakda. Ang mga manggagawang-bukid naman na nagtatrabaho sa mga sugar mills ay inaalila ng mga sagadsarin katulad ng mga Lorenzo at Carsumco.
Bukod sa pagbabarat ng presyo ng ani, inaagawan pa ng lupa ng mga imperyalistang mandarambong ang mga magsasaka at katutubo ng Lambak Cagayan. Talamak ang pang-aagaw at pagpapalit-gamit sa lupa para sa mining operations ng Nickel Asia sa Dinapigue at ng Golden Summit sa Cordon sa Isabela na siyang nagpatalsik ng mga katutubo at magsasaka sa lugar, gayundin ang black sand mining sa Cagayan River at offshore magnetite mining sa baybayin ng northeast Cagayan.
Hindi maitatanggi na ang rehimeng US-Marcos ay gumagampan ng malaking papel sa panlilinlang sa mga magsasaka sa pamamagitan ng pagbibigay ng Certificate of Land Ownership Award (CLOA) at kondonasyon sa mga utang sa ilalim ng huwad na New Agrarian Emancipation Act (NAEA) para magkunwaring maka-magsasaka at magmistulang tagapaglaya nila. Ang katotohanan ay ang rehimeng ito ang nagpapapasok ng mga dayuhang mandarambong at sumusulsol sa lokal na nang-aapi. Ginagamit ng rehimen ang AFP-PNP upang takutin at patayin ang mga magsasakang lumalaban at tugisin ang rebolusyonaryong kilusan.
Habang nagpapakasasa ang mga kurakot at burukrata sa bilyun-bilyong ninakaw nila sa kaban ng bayan, ang mga magsasaka ay lubog sa bahang dulot ng walang-tigil na paghagupit ng mga bagyo at kriminal na kapabayaan ng gubyerno. Ang mamamayan ng Lambak Cagayan na niragasa ng apat na bagyo sa isang buwan ay walang napala mula sa pondo ng mga proyektong ito dahil lahat ng ito ay dumidiretso sa maruruming bulsa ng burukrata! Marapat lang na panagutin sila ng taumbayan, marapat lang na sumulong ang armadong pakikibaka upang litisin ang mg sagadsaring burukrata kapitalista! Ang mga magsasaka, kasama ng kabataan at iba pang sektor ng lipunan, ay lumalagablab ang diwa para isulong ang digmaan laban sa imperyalismo, pyudalismo, at burukrata kapitalismo.
Magsasaka, tagapagtanggol ng lupa ng mamamayan! Pangunahing pwersa ng demokratikong rebolusyong bayan!
Bukod-tanging tinatanggap ng mamamayan ng Cagayan Valley ang rebolusyonaryong programa at patakaran sa lupa dahil ito ang tunay na makakapagpalaya sa kanila. Sa kaliwa’t kanang propaganda ng estado laban sa Bagong Hukbong Bayan at sa rebolusyonaryong kilusan, pinapakita ng masang magsasaka ang mapangahas na paglaban dahil tanging sa demokratikong rebolusyong bayan na may sosyalistang perspektiba lamang matatamo ang tunay na paglaya sa malakolonyal at malapyudal na pagsasamantala. Sa armadong pakikibaka lamang makukuha ng mga magsasaka ang kanilang lupa at makawala sa tanikala ng imperyalista at mga panginoong maylupa. Ngayong buwan ng mga magbubukid, taas-kamao nating pagpugayan ang mga magsasaka bilang pangunahing pwersa ng rebolusyong Pilipino, bilang malaking pwersa ng Bagong Hukbong Bayan!
Pyudalismo, Ibagsak!
Imperyalismo, Ibagsak!
Burukrata Kapitalismo, Ibagsak!
Sumapi sa Bagong Hukbong Bayan!
