Daw mga idu-buang ang mga berdugong 62nd IB nga nagalambiyong sa kabukiran sang Central Negros sa pagpangita sa mga katapo sang New People’s Army (NPA).
Hulyo 8, alas 8:00 sang gab-i—namutikan sang pumuluyo ang lima ka Reo truck nga puno sang militar pataklad sa CAFGU detachment sa Barangay Montilla halin sa 62nd IB headquarters sa Barangay Libas, Isabela, Negros Occidental.
Samtang duha naman ka Reo truck nga puno sang tropa militar ang halin man sa nasambit nga hedkwarter kag nagpadulong sa Sityo Mamballo, 62nd IB Patrol Base sa Moises Padilla, Negros Occidental.
Kadungan man sini, kapin sa 60 ka tropa militar ang sakay man sa duha ka Reo truck nga gin-ula sa Sityo Tuko, Barangay Trinidad, Guihulngan City, Negros Oriental gikan sa Sityo Kasingan sakop gihapon sang nasambit nga baryo. Ini nga tropa militar ang nagpadulong sa Sityo Bungao.
Nagatiner ang nasambit nga militar malapit sa eskwelahan samtang nagapanaka-saka sila sa mga kabalayan.
Hulyo 9 sang kaagahon—makita ang mga ini nga nagatiner sa populado nga lugar sa Sityo Pastuhan kag Bungao sakop sang Barangay Trinidad, Guihulngan City.
Hulyo 10 sang aga—nakita na ang anum ka kolum sang pasistang militar sa mga sityo sang Agogolo kag Mantauyan, sakop sang Barangay Macagahay, Moises Padilla subong man sa mga Sityo sang Bungao kag Pastuhan sang Barangay Trinidad, Guihulngan City.
May duha man ka kolum sa Sityo Tibubong, Barangay Quintin Remo, Moises Padilla. Nagatiner ang mga ini sa eskwelahan nga nagadisturbo sa pagtuon sang mga kabataan kag pagtudlo sang mga manunudlo.
Sa Barangay Bucalan, Canlaon City, Negros Oriental, may tatlo man ka katapo sang militar nga nakasibilyan nga nagapanaka-saka sa mga kabalayan kag nagapang-imbestigar sa pumuluyo kaangot sa presensya sang NPA.
Kadungan man sini ang pabalik-balik nga pagpanaka-saka sang tatlo ka katapo sang nakasibilyan nga militar sa mga panimalay sa Sityo Gusa, Barangay Budlasan, Canlaon City.
Nagapinahubog kag naga-videoke ang mga soldado nga nagadisturbo sa mahamuok nga pagtulog sang mga pumuluyo sa lugar.
Suno sa mga mangunguma, perwisyo sa ila ang presensya sang militar kag nagahatag lamang sang kakugmat sa ila malinong nga pagpangabuhi sa kaumahan sang Central Negros.
