Balligi a naangay ti National Democratic Front of the Philippines (NDFP) ti maikatlo nga internasyunal a kumperensya a teoretikal idiay Amsterdam, The Netherlands idi Nobyembre 29-30. Topiko ti kumperensya ti teorya ti nailyan a pannakawayawa manipud iti imperyalismo. Ti kumperensya ket dinar-ayan ti 114 indibidwal a nangibagi iti 57 proletaryo-sosyalista a partido, tignay iti nailyan a pannakawayawaya ken anti-imperyalista nga organisasyon.
Malagip a naangay ti umuna ken maikadwa a kumperensya a teoretikal idi Oktubre 2023 ken Marso 2024 a nangtalantan iti imperyalista a gubat ken imperyalista a krisis iti ekonomya. Segun iti NDFP, sinaklaw ti maikatlo a kumperensya dagiti teoretikal ken praktikal a kontribusyon da Lenin, Stalin ken Mao kanaig ti usapin ti nailyan a pannakawayawaya, kabilang ti nadumaduma a pamuspusan ti panangirupir ken panangitandudo iti karbengan iti bukod-a-pangngeddeng, agpada iti armado ken saan nga armado. Ti umuna nga aldaw ti kumperensya ket naaramat iti presentasyon dagiti naisaganan a kontribusyon. Naangay ti plenaryo iti maikadwa nga aldaw nu sadinno a nasuma dagiti punto dagiti delegado.
Kabilang kadagiti topiko a natalantan ti dangran nga ituntunda dagiti imperyalista nga agresyon ken dagiti gera a proxy iti wayawaya ken panagwaywayas dagiti pagilyan. Sinaklaw met dagiti talakayan ti nadumaduma nga usapin a sangsangwen dagiti saan a nalpas a tignay a mamagwayawaya, ken ti pagkasapulan nga ituloy ti panagkonsolida ken panangsalaknib kadagiti nagun-oden a balligi. Maysa kadagiti napagsasaritaan ti panangbukel ken panangpapigsa ti internasyunal a suporta para kadagitoy a tignay.
Napalaus a nakaragsakan ti Communist Party of the Philippines (CPP) ti panangtalantan iti nailyan a panangwayawaya iti maikatlo a kumperensya. Nakalanad iti kangrunaan nga artikulo iti taripnong nga insurat ti Komite Sentral ti CPP: “Ti dangadang ti maidadanes nga umili iti sangalubongan para iti pannakawayawaya ket agserserbi a maysa kadagiti krusyal nga elemento iti kabuklan nga estratehiya tapno iyabante ti internasyunal a rebolusyonaryo a tarigagay ti proletaryo.”
Kuna daytoy, gapu iti panangidadanes ti imperyalismo, nagbalin a napigsa ti panagtarigagay dagiti umili iti nailyan a pannakawayawaya wenno bukod-a-pangngeddeng manipud iti kolonyalismo. Kadagitoy a pagilyan, nakagalut ti dadakkel a burges-kumprador iti kolonyal nga ekonomya ken paspasurot da kadagiti imperyalista, ken nakapsut ti petiburges ken nailyan a burgesya. Iti kasta, adda iti abaga ti dasig a mangmangged ti rebbengen a pagkaykaysaen ti amin a maidadanes a dasig ken sektor ken idauluan ti laban para iti nailyan a pannakawayawaya. Iti panawen ti imperyalismo ken proletaryo a rebolusyon, timmaud ti baro a tipo ti burges-demokratiko a rebolusyon, nga idadauluan ti proletaryo, ken maiyab-abante kas umuna nga addang para iti panangisayangkat ti sosyalista a rebolusyon ken konstruksyon.
Ti kontribusyon ti nadumaduma a delegado iti kumperensya ket nakatulong iti panagpauneg ken panagpabaknang iti talakayan iti usapin ti nailyan a pannakawayawaya. Inbingay ti rebolusyonaryo a grupo manipud iti Cyprus ti papel nga ak-akemen ti teritoryo da kadagiti imperyalista a gubat iti Middle East ken North Africa. Iti agdama, daytoy ket ar-aramaten ti lima a bileg ti NATO (Turkey, Greece, US, United Kingdom ken France) bilang base ken pangisayangkatan ti kampanya a henosidyo ti US ken ti Zionista nga Israel iti Palestine, kasta met iti panangpalawa ti gera nga agresyon iti Middle East.
Kabayatanna, inlanad dagiti pwersa a komunista iti Turkey ken Kurdistan ti agsilpo a laban da. Ti tignay a Turkish kas tignay a lumablaban iti maysa a pagilyan a pagar-arian dagiti imperyalista a bileg, bayat a ti tignay Kurdish ket idaddadanes ti kumprador nga estado ti Turkey. Nauneg met ti silpo ti tignay ti Kurdistan iti Palestine, nu sadinno nga umuna a nagsanay dagiti mannakigubat da.
Iti kabuklan, nagbalin a nabunga dagiti talakayan ken nadanon ti baro a tukad ti panagkaykaysa iti baet dagiti delegado. Nagiyebkas met dagiti Partido ken organisasyon ti napalaus a suporta da iti tignay mamagwayawa iti Palestine ken kadagiti grupo a mangitantandudo ditoy, kabilang ti Hamas. Malaksid kadagiti nadakamaten a pagilyan, nagisumite met ti kontribusyon ken pannirigan dagiti kakadwa manipud iti Eritrea, Nepal, Senegal, Italy ken US.
Iti panaggibus ti kumperensya, naiyaramid ti maysa nga espesyal a kultural a pabuya idi Nobyembre 30 kas pananglagip iti maika-60 anibersaryo ti Kabataang Makabayan ken ti istorikal a papel daytoy iti panangiyabante ti rebolusyonaryo a tignay agtutubo iti Pilipinas ken panangguyugoy ti pannakikaykaysa iti rebolusyon a Pilipino.
